Тошкент шаҳрида 3—4 август кунлари Ўзбекистон Республикасининг Шанхай ҳамкорлик ташкилотига раислиги доирасида Ҳудудлар раҳбарлари форуми бўлиб ўтади. Бу ҳақда Ташқи ишлар вазирлиги хабар қилди.
Қайд этилишича, форумнинг асосий мақсади ШҲТга аъзо давлатлар эътиборини туризм, маданият ва қишлоқ хўжалигини ривожлантириш масалаларига жалб этишдан иборат ҳисобланади. Икки кунлик тадбир дастури ялпи мажлис ва учта панел мунозаралари, шунингдек, Ташкилотга аъзо мамлакатлар ишбилармон доиралари вакиллари иштирокида бўлиб ўтадиган бизнес-форумни ўз ичига олади.
Панел мунозараларида иштирокчилар томонидан қишлоқ хўжалиги маҳсулотларини ишлаб чиқариш ва қайта ишлаш бўйича қўшма юқори технологик лойиҳалар, қишлоқ хўжалиги соҳасида, шу жумладан, озиқ-овқат маҳсулотлари ишлаб чиқаришда инновацион технологияларни жорий этиш, шунингдек, туризм ва транспорт логистикаси соҳасидаги ҳамкорликка эътибор қаратилади.
Ҳудудлар раҳбарлари форуми ШҲТга аъзо мамлакатларга минтақани ривожлантиришнинг истиқболли йўналишларини ҳар томонлама кўриб чиқиш имконини берадиган мулоқот платформаси вазифасини бажаради.
Изоҳ (0)