Issiqko‘l viloyati Cho‘lpon ota shahrida Qirg‘iziston Milliy xavfsizlik davlat qo‘mitasi raisligida Turkiy davlatlar maxsus xizmatlari konferensiyasining XXIV yig‘ilishi bo‘lib o‘tdi. Bu haqda “Kabar.kg” agentligi ma’lum qildi.
Yig‘ilishda Ozarbayjon, Qozog‘iston, Turkiya, O‘zbekiston va Qirg‘iziston maxsus xizmatlari rahbarlari va vakillari, shuningdek, Rossiya va Vengriya maxsus xizmatlari delegatsiyalari kuzatuvchi sifatida ishtirok etdi.
Uchrashuvda Yaqin Sharq va Afg‘onistondagi terrorchilik bilan bog‘liq vaziyat sharoitida Turkiy davlatlarda xavfsizlik va barqarorlikni ta’minlash sohasida maxsus xizmatlar o‘zaro hamkorligining dolzarb masalalari muhokama qilindi.
Konferensiya ishtirokchilari Afg‘oniston va Suriyada qurolli to‘qnashuvlardan kelib chiquvchi terrorchilik tahdidlarini muhokama qilib, o‘zaro hamkorlik mexanizmlarini kelishib oldi.
Mazkur yig‘ilish ishi doirasida Qirg‘iziston prezidentining Turkiy davlatlar maxsus xizmatlari rahbarlari bilan uchrashuvi bo‘lib o‘tdi. Sadir Japarov yig‘ilish ishtirokchilariga murojaatida Turkiy davlatlar manfaatlariga daxldor tashqi tahdidlarga qarshi birgalikdagi ishlarda maxsus xizmatlarning yaqin hamkorligi va sa’y-harakatlarini birlashtirish muhimligini ta’kidladi.
Shuningdek, yig‘ilish ishtirokchilari tomonidan ochiq muloqot va eshitilgan ma’ruzalar yuzasidan fikr almashildi, yakunda erishilgan kelishuvlarni amalga oshirish bo‘yicha chora-tadbirlar ko‘rish yuzasidan qaror qabul qilindi.
Ma’lumot uchun, Turkiy davlatlar maxsus xizmatlari konferensiyasi ilk bor 1998-yilda tashkil etilgan. Uning asosiy vazifasi xalqaro xarakterdagi uyushgan jinoyatchilikka qarshi kurashish sohasida va maxsus xizmatlar faoliyatining kelishilgan boshqa yo‘nalishlarida samarali hamkorlikni ta’minlashdan iborat.
Izoh (0)