Buyuk Britaniyaning Konservativlar partiyasi rahbarligi uchun kurashayotgan sobiq moliya vaziri Rishi Sunak va amaldagi tashqi ishlar vaziri Liz Trass 26-iyul kuni kechqurun Talk TV telekanalida debat o‘tkazdi.
Debat taxminan bir soat davom etishi rejalashtirilgan edi, biroq yarim soat o‘tgach, efirni olib borayotgan boshlovchi Keyt Makkann hushidan ketib qoldi. Shu sabab debatni to‘xtatishga to‘g‘ri keldi.
Makkenn hushini yo‘qotgan lahza kadrga tushmagan – kamera Ukrainadagi urush haqida gapirayotgan Trassga qaratilgan edi. Ammo kutilmagan vaziyatdan gangib qolgan Trass “O, Xudoyim!” deb xitob qildi, shundan so‘ng efir to‘xtatildi.
Telekanal matbuot xizmati Makkann o‘zini yaxshi his qilayotganiga ishontirdi, ammo shifokorlar unga tanaffus qilishni va efirga qaytmaslikni tavsiya qilgan. Telekanal debatni to‘xtatishga to‘g‘ri kelgani uchun tomoshabinlardan uzr so‘radi.
Keyt Makkann debatni The Sun gazetasining siyosiy muharriri Garri Koul bilan olib borishi rejalashtirilgan edi. Biroq, debat oldidan Koulning koronavirusga topshirgan testi musbat chiqqan va Makkann uchrashuvning yagona moderatori bo‘lib qolgan.
Sunak va Trass saylovlarning birinchi bosqichida konservativ deputatlarning ko‘pchilik ovozini qo‘lga kiritib, yakuniy bosqichga chiqqan edi. Endi Konservatorlar partiyasining barcha a’zolari nomzodlar uchun ovoz berishi kerak. Yangi rahbar kim bo‘lishi 5-sentabr kuni ma’lum bo‘ladi. Sunak parlamentdagi ovoz berishda yetakchi edi, ammo hozir, so‘rovnomalarga ko‘ra, u mashhurlik bo‘yicha Trassdan quyida bormoqda.
Izoh (0)