Иссиқкўл вилояти Чўлпон ота шаҳрида Қирғизистон Миллий хавфсизлик давлат қўмитаси раислигида Туркий давлатлар махсус хизматлари конференциясининг XXIV йиғилиши бўлиб ўтди. Бу ҳақда «Kabar.kg» агентлиги маълум қилди.
Йиғилишда Озарбайжон, Қозоғистон, Туркия, Ўзбекистон ва Қирғизистон махсус хизматлари раҳбарлари ва вакиллари, шунингдек, Россия ва Венгрия махсус хизматлари делегациялари кузатувчи сифатида иштирок этди.
Учрашувда Яқин Шарқ ва Афғонистондаги террорчилик билан боғлиқ вазият шароитида Туркий давлатларда хавфсизлик ва барқарорликни таъминлаш соҳасида махсус хизматлар ўзаро ҳамкорлигининг долзарб масалалари муҳокама қилинди.
Конференция иштирокчилари Афғонистон ва Сурияда қуролли тўқнашувлардан келиб чиқувчи террорчилик таҳдидларини муҳокама қилиб, ўзаро ҳамкорлик механизмларини келишиб олди.
Мазкур йиғилиш иши доирасида Қирғизистон президентининг Туркий давлатлар махсус хизматлари раҳбарлари билан учрашуви бўлиб ўтди. Садир Жапаров йиғилиш иштирокчиларига мурожаатида Туркий давлатлар манфаатларига дахлдор ташқи таҳдидларга қарши биргаликдаги ишларда махсус хизматларнинг яқин ҳамкорлиги ва саъй-ҳаракатларини бирлаштириш муҳимлигини таъкидлади.
Шунингдек, йиғилиш иштирокчилари томонидан очиқ мулоқот ва эшитилган маърузалар юзасидан фикр алмашилди, якунда эришилган келишувларни амалга ошириш бўйича чора-тадбирлар кўриш юзасидан қарор қабул қилинди.
Маълумот учун, Туркий давлатлар махсус хизматлари конференцияси илк бор 1998 йилда ташкил этилган. Унинг асосий вазифаси халқаро характердаги уюшган жиноятчиликка қарши курашиш соҳасида ва махсус хизматлар фаолиятининг келишилган бошқа йўналишларида самарали ҳамкорликни таъминлашдан иборат.
Изоҳ (0)