Eron Rossiya bilan rus samolyotlari uchun ehtiyot qismlar va jihozlarni yetkazib berish, shuningdek, samolyotlarni ta’mirlash va texnik xizmat ko‘rsatishni nazarda tutuvchi shartnoma imzoladi. Bu haqda Eron fuqaro aviatsiyasi boshqarmasiga tayanib, Mehr agentligi xabar berdi.
Tomonlar, shuningdek, Rossiya va Eron o‘rtasidagi reyslar sonini haftasiga 35 tagacha oshirishga kelishib olgan.
Rossiya Ukrainaga bostirib kirganidan so‘ng, Yevropa Ittifoqi rus samolyotlari uchun osmonni yopgan, ular uchun ehtiyot qismlarni yetkazib berishni, texnik xizmat ko‘rsatishni, ularni qo‘llab-quvvatlash va sug‘urtalashni taqiqlagan edi, shuningdek, lizing firmalarini Rossiya tashuvchilariga ijaraga berilgan samolyotlarni qaytarib olishga majbur qilgan.
Iyul oyida AQSH rasmiylari Rossiya Ukrainadagi urushda foydalanish uchun Erondan bir necha yuzlab dron sotib olishni rejalashtirayotganini ma’lum qilgandi. Eron bunday rejalarni rad etdi. Bir necha kun oldin Ukrainaning “Senzor.net” nashri dronlarning birinchi partiyasi allaqachon Rossiyaga yuborilgani haqida xabar berdi. Ammo Oq uyning ta’kidlashicha, u dronlar sotib olingani va yetkazib berilganidan dalolat beruvchi alomatlarni hali ko‘rmagan.
Iyul oyi o‘rtalarida Rossiya prezidenti Vladimir Putin Tehronga tashrif buyurdi, u yerda Suriya bo‘yicha kelishuvga kafil davlatlar: Rossiya, Eron va Turkiya sammiti bo‘lib o‘tdi. Putin uchun bu Ukraina bosqinidan keyin sobiq Sovet Ittifoqi davlatlaridan tashqariga birinchi tashrif bo‘ldi.
Izoh (0)