Prezident matbuot kotibi Sherzod Asadov ishtirokida 25-iyul kuni bo‘lib o‘tgan brifingda prezident Shavkat Mirziyoyevning joriy haftadagi rejalari haqida ma’lumot berildi. Bu haqda “Daryo” muxbiri xabar berdi.
2021-yilning sentabr oyida to‘xtatilgan brifing 25-iyuldan boshlab qayta tiklandi. Ta’kidlash joiz, davlat rahbarining faoliyati haqida ma’lumot berib boradigan mazkur brifing tiklanishi Prezident Adminstratsiyasi rahbariyatida o‘zgarish bo‘lganidan so‘ng amalga oshmoqda.
Shavkat Mirziyoyevning o‘tgan haftadagi faoliyati haqida
18-iyul kuni prezident aholiga bo‘lib berilgan ekin yerlari va tomorqadan samarali foydalanish bo‘yicha videoselektor yig‘ilishi o‘tkazdi hamda xalq uchun muhim ahamiyatga ega quyidagi uchta yo‘nalishni belgilab berdi.
19-iyul kuni O‘zbekiston Respublikasi Prezidenti Shavkat Mirziyoyev Gruziya Bosh vaziri Irakliy Garibashvili hamda Eron Islom Respublikasi vitse-prezidenti Sorena Sattoriy bilan uchrashuvlar o‘tkazdi.
21-iyul kuni davlat rahbari Qoraqalpog‘iston Respublikasi hududida favqulodda holatning amal qilishini muddatidan avval tugatish to‘g‘risida farmon qabul qildi.
Prezident 20-21-iyul kunlari Qirg‘iz Respublikasining Cho‘lponota shahrida bo‘lib o‘tgan Markaziy Osiyo davlatlari rahbarlarining to‘rtinchi Maslahat uchrashuvida ishtirok etdi.
Haftaning so‘nggi kuni yakshanba dam olish kuni bo‘lishiga qaramasdan, davlat rahbari uchun faol tarzda kechdi. Prezident Markaziy Osiyo, Mustaqil Davlatlar Hamdo‘stligi mamlakatlari, shuningdek, Turkiya Respublikasi yetakchilari bilan telefon orqali muloqotlar qildi.
Muloqotlarda xorijiy davlat rahbarlari Shavkat Mirziyoyevni tavallud ayyomi bilan qutladi, shuningdek, ikki tomonlama aloqalarning yanada rivojlantirish borasida suhbat qildi.
O‘zbekiston bilan Rossiya o‘rtasidagi munosabatlarni mustahkamlashdagi katta xizmatlari uchun Shavkat Mirziyoyev Rossiya prezidenti tomonidan Aleksandr Nevskiy ordeni bilan taqdirlandi.
Yangi boshlangan haftada prezident nimalar bilan band bo‘ladi?
Hafta davomida prezident huzurida bir nechta dolzarb masalalarga doir tadbir muhokamalar rejalashtirilgan.Xususan, tarmoq va hududlarda axborot texnologiyalarini joriy etish bo‘yicha amalga oshirilayotgan ishlar va kelgusidagi ustuvor vazifalar yuzasidan videoselektor o‘tkazilishi ko‘zda tutilgan.
28—29-iyul kunlari Toshkentda Shanhay hamkorlik tashkilotiga a’zo davlatlar Tashqi ishlar vazirlarining yig‘ilishi bo‘lib o‘tadi. Prezidentning Tashkilot tashqi ishlar vazirlari bilan uchrashuvi ko‘zda tutilgan.
Bundan tashqari, 25—26-iyul kunlari Toshkentda Afg‘oniston bo‘yicha xalqaro konferensiya bo‘lib o‘tadi va unda 20 dan ortiq davlat delegatsiyalari ishtirok etadi. Ularga Shavkat Mirziyoyev murojaat yo‘llashi kutilmoqda.
Izoh (0)