Президент матбуот котиби Шерзод Асадов иштирокида 25 июль куни бўлиб ўтган брифингда президент Шавкат Мирзиёевнинг жорий ҳафтадаги режалари ҳақида маълумот берилди. Бу ҳақда «Дарё» мухбири хабар берди.
2021 йилнинг сентябрь ойида тўхтатилган брифинг 25 июлдан бошлаб қайта тикланди. Таъкидлаш жоиз, давлат раҳбарининг фаолияти ҳақида маълумот бериб борадиган мазкур брифинг тикланиши Президент Админстрацияси раҳбариятида ўзгариш бўлганидан сўнг амалга ошмоқда.
Шавкат Мирзиёевнинг ўтган ҳафтадаги фаолияти ҳақида
18 июль куни президент аҳолига бўлиб берилган экин ерлари ва томорқадан самарали фойдаланиш бўйича видеоселектор йиғилиши ўтказди ҳамда халқ учун муҳим аҳамиятга эга қуйидаги учта йўналишни белгилаб берди.
19 июль куни Ўзбекистон Республикаси Президенти Шавкат Мирзиёев Грузия Бош вазири Ираклий Гарибашвили ҳамда Эрон Ислом Республикаси вице-президенти Сорена Сатторий билан учрашувлар ўтказди.
21 июль куни давлат раҳбари Қорақалпоғистон Республикаси ҳудудида фавқулодда ҳолатнинг амал қилишини муддатидан аввал тугатиш тўғрисида фармон қабул қилди.
Президент 20-21 июль кунлари Қирғиз Республикасининг Чўлпонота шаҳрида бўлиб ўтган Марказий Осиё давлатлари раҳбарларининг тўртинчи Маслаҳат учрашувида иштирок этди.
Ҳафтанинг сўнгги куни якшанба дам олиш куни бўлишига қарамасдан, давлат раҳбари учун фаол тарзда кечди. Президент Марказий Осиё, Мустақил Давлатлар Ҳамдўстлиги мамлакатлари, шунингдек, Туркия Республикаси етакчилари билан телефон орқали мулоқотлар қилди.
Мулоқотларда хорижий давлат раҳбарлари Шавкат Мирзиёевни таваллуд айёми билан қутлади, шунингдек, икки томонлама алоқаларнинг янада ривожлантириш борасида суҳбат қилди.
Ўзбекистон билан Россия ўртасидаги муносабатларни мустаҳкамлашдаги катта хизматлари учун Шавкат Мирзиёев Россия президенти томонидан Александр Невский ордени билан тақдирланди.
Янги бошланган ҳафтада президент нималар билан банд бўлади?
Ҳафта давомида президент ҳузурида бир нечта долзарб масалаларга доир тадбир муҳокамалар режалаштирилган.Хусусан, тармоқ ва ҳудудларда ахборот технологияларини жорий этиш бўйича амалга оширилаётган ишлар ва келгусидаги устувор вазифалар юзасидан видеоселектор ўтказилиши кўзда тутилган.
28—29 июль кунлари Тошкентда Шанҳай ҳамкорлик ташкилотига аъзо давлатлар Ташқи ишлар вазирларининг йиғилиши бўлиб ўтади. Президентнинг Ташкилот ташқи ишлар вазирлари билан учрашуви кўзда тутилган.
Бундан ташқари, 25—26 июль кунлари Тошкентда Афғонистон бўйича халқаро конференция бўлиб ўтади ва унда 20 дан ортиқ давлат делегациялари иштирок этади. Уларга Шавкат Мирзиёев мурожаат йўллаши кутилмоқда.
Изоҳ (0)