Sirdaryoda bola o‘limi 31 yil o‘tib qayd etildi

Sirdaryo viloyati Sardoba tumanida 1991-yilda vafot etgan bolaning o‘limi 31 yil o‘tib rasmiylashtirildi.

Xabar qilinishicha, “Paxtakor” mahalla fuqarolar yig‘inida istiqomat qiluvchi Maxsuma O‘sarovaning farzandi bundan o‘ttiz bir yil avval vafot etgan. Biroq e’tiborsizlik sabab farzandining o‘limi haqidagi guvohnoma rasmiylashtirilmagan. Oqibatda M.O‘sarova nafaqa olishda muammoga duch kelgan. Shundan so‘ng vafot etgan o‘g‘lining o‘lganlik faktini belgilashda amaliy yordam so‘rab Sardoba tumani adliya bo‘limiga murojaat qilgan.

Murojaat adliya bo‘limining ish yurituviga olinib, zarur hujjatlar to‘plandi. Aniqlanishicha, Maxsuma O‘sarova va Hasan O‘sarovning birgalikdagi turmushidan 1987-yil 25-sentabrda o‘g‘il farzand dunyoga kelgan. U 1991-yil 30-iyunda vafot etgan.

O‘rganish davomida Davlat xizmatlari agentligining arxiv ma’lumotlar bazasida o‘lim haqida dalolatnoma yozuvlari mavjud emasligi aniqlandi. Tuman obodonlashtirish boshqarmasi tomonidan bola dafn etilgan joy to‘g‘risida ma’lumotnoma taqdim etildi va murojaatchining qo‘shnilari tomonidan ushbu oilaning bir nafar o‘g‘il farzandi olamdan o‘tgani tasdiqlandi.

Shunga ko‘ra, tuman adliya bo‘limi tomonidan bolaning o‘lim faktini belgilash yuzasidan Oqoltin tumanlararo sudiga da’vo ariza kirildi. Da’vo qanoatlantirilib, O‘sarov Oybek Hasanovich (bola)ning 1991-yil 30-iyunda o‘lganlik faktini belgilash yuzasidan sudning hal qiluv qarori chiqarildi.