Konstitutsiyaga o‘zgartirish kiritish bo‘yicha qonun loyihasi: Davlat oilaning rivojlanishi uchun zarur bo‘lgan sharoitlarni yaratadi

Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.

Unga ko‘ra, davlat oilaning to‘laqonli rivojlanishi uchun zarur bo‘lgan ijtimoiy va iqtisodiy sharoitlarni yaratishi Konstitutsiyada belgilab qo‘yilmoqda.

“Davlat ko‘p bolali oilalarga qonunga muvofiq imtiyozlar va ijtimoiy kafolatlar berilishini ta’minlaydi”, deyiladi 63-moddaga kiritilayotgan o‘zgarishda.

Jamiyatimizning birlamchi bo‘g‘ini bo‘lgan oila institutini bugungi shiddat bilan o‘zgarib borayotgan globallashuv davrida davlat tomonidan ijtimoiy-iqtisodiy qo‘llab-quvvatlash orqali oilalarda farovon turmush va tinch-totuvlikni ta’minlash davlat siyosatining ustuvor yo‘nalishlaridan biri ekanligidan dalolat beradi.

Ushbu normani kiritish oilalarni qo‘llab-quvvatlash tizimining samaradorligini oshirish, ijtimoiy himoya va ko‘makka muhtoj oilalar, ko‘p bolali oilalarni moddiy ta’minotini kuchaytirish, ularga imtiyozlar va ijtimoiy kafolatlar berilishini qonun darajasida ta’minlaydi.

Shuningdek, ushbu normalar oilalarning iqtisodiy asoslarini mustahkamlashga, jamiyatimizdagi barqarorlikni ta’minlashga hamda iqtidorli yosh avlodni tarbiyalash va qo‘llab-quvvatlashga xizmat qiladi.