Namanganda o‘tkazilgan buyrak transplantatsiyasi operatsiyasida 4 farzandning onasi bo‘lgan 35 yashar ayol eriga donor bo‘ldi

Namanganda o‘tkazilgan buyrak transplantatsiyasi operatsiyasida 35 yashar ayol turmush o‘rtog‘iga donor bo‘ldi. Bu haqda “Daryo” muxbiri Azizbek Abduvaliyev xabar bermoqda.

Respublika shoshilinch tibbiy yordam ilmiy markazi shoshilinch xirurgiya va xirurgik transplantologiya bo‘limi rahbari, tibbiyot fanlari doktori, professor Farhod Hojiboyev boshchiligidagi 12 nafar mutaxassis tomonidan RSHTYIM Namangan filialida mahorat darslari o‘tkazildi. Mahorat darsining amaliy qismida surunkali buyrak yetishmovchiligi kasalligiga chalingan va besh yildan beri gemodializ olib yurgan 37 yoshli erkak bemorda buyrak transplantatsiyasi amalga oshirildi. Unga turmush o‘rtog‘i, 4 nafar farzandning onasi bo‘lgan 35 yashar ayol donorlik qildi.

“Qariyb 4, 5 soat davom etgan murakkab operatsiya muvaffaqiyatli yakunlandi. Hozirda donor va bemorning ahvoli qoniqarli. Ularga bir haftadan so‘ng uylariga javob bersak kerak”, — deydi RSHTYIM Namangan filiali Abror Alijonov.

Ushbu amaliyot RSHTYIM Namangan filialida ilk bor bajarildi. Abror Alijonovning qayd etishicha, kelgusida bunday operatsiyalar filialda to‘liq yo‘lga qo‘yiladi. Buning uchun 8 nafar mahalliy mutaxassis tanlab olingan. Ular avval Toshkentda, so‘ng xorijda malaka oshirib qaytishi ko‘zda tutilmoqda.

Mavzuga doir: “Yuragimni so‘rashganda ham bergan bo‘lardim”. Namanganlik ayol viloyatda ilk bor o‘tkazilgan buyrak transplantatsiyasi operatsiyasida eriga donor bo‘ldi