20-iyul kuni ertalab Rossiya qo‘shinlari Xarkov shimolidagi Saltovka hududini o‘qqa tutdi. Raketalar avtobus bekatiga kelib tushdi: 3 nafar tinch aholi, jumladan 13 yoshli bola halok bo‘ldi. Rossiya tashqi ishlar vaziri Sergey Lavrov “Ukraina bilan muzokara qilishdan ma’no yo‘q”ligini va “maxsus operatsiya geografiyasi” o‘zgarganini aytdi: “Bu faqat DXR va LXR bilan cheklanmaydi, bu Xerson, Zaporojye viloyati va boshqa bir qator hududlarni o‘z ichiga oladi”.
Zaporojye viloyatining okkupatsion hukumati Ukraina dronlari Zaporojye atom elektr stansiyasiga zarba bergani va 11 kishi jabr ko‘rganini da’vo qilmoqda. Belgorod viloyati, mahalliy hokimiyat ma’lumotlariga ko‘ra, “Ukraina tomonidan” o‘qqa tutilgan, oqibatda mahalliy aholi halok bo‘lgan. Yevropa Ittifoqi Rossiyaga qarshi sanksiyalarning yettinchi paketini tasdiqladi. Yevrokomissiya rahbarining fikricha, YI Rossiya gazidan butunlay voz kechishi mumkin. Meduza Ukrainadagi urushning 147-kuniga oid asosiy fotosuratlarini taqdim etdi.
Kiyev viloyati
Yelena Barva 24-fevral kuni Gostomelni tark etgan edi — shahar urushning dastlabki soatlaridan boshlab rus qo‘shinlarining asosiy nishonlaridan biriga aylangan. Ayol Buchaga joylashdi, so‘ng G‘arbiy Ukrainaga ko‘chdi. Bir necha oy o‘tgach, Yelena o‘zi 44 yil yashagan kvartirasi Rossiya zarbasidan omon qolgan-qolmaganini ko‘rish uchun Gostomelga qaytdi.Foto: EPA
Xavfli bo‘lgani uchun Yelena kvartirasi joylashgan beshinchi qavatga ko‘tarila olmadi — aynan ushbu turar joy bino eng ko‘p zararlangan. U mobil telefoni yordamida vayron bo‘lgan uyining bir nechta fotosuratlarini oldi. Ayolning aytishicha, u derazadan oshxonasidagi oq pechkani ko‘rgan. Kelajakda nima bo‘ladi, unga qorong‘i. Hozircha ayol mamlakatning g‘arbiy qismida qoladi, lekin bir kun kelib Gostomelga qaytishga umid qilmoqda.Foto: EPA
Xerson viloyati
Ishchilar Xerson viloyatidagi reklama plakatini almashtirmoqda. Hududning salmoqli qismi mart oyi boshidan beri Rossiya qo‘shinlari nazoratida. “Yangi ma’muriyat” vakillari mintaqaning Rossiya tarkibiga kirishi bo‘yicha referendumlar o‘tkazishi haqida bir necha bor e’lon qilgan.Foto: “TASS”
Dnepr daryosi ustidan o‘tgan Antonovskiy ko‘prigi, u Xersonni mintaqaning chap qirg‘oq qismi bilan bog‘laydi. U tomon shaharning o‘zi kabi Rossiya qo‘shinlari nazorati ostida. Ko‘prikdan rus qo‘shinlari jihozlar va o‘q-dorilarini olib o‘tadi. 19 — 20-iyul kunlari Ukraina ko‘prikka raketa hujumlarini amalga oshirdi. Agar u buzib tashlansa, Xerson viloyatining o‘ng qirg‘og‘idagi rus harbiylari asosiy guruhdan uziladi.Foto: “TASS”
Ukraina artilleriyachilari qurol va maxsus texnikalarni frontga jo‘natishdan oldin tekshirmoqda.Foto: Anadolu
Ukraina artilleriyachilari Xerson viloyatidagi harbiy yig‘ilish punktida.Foto: Anadolu
Donbass shimoli
DXR jangchilari Avdeyevka yaqinidagi yo‘lni kuzatmoqda. Shahar Donetskdan 13 kilometr uzoqlikda joylashgan va strategik muhim nuqta hisoblanadi. 19-iyul kuni DXR xalq militsiyasi vakili Eduard Basurin Avdeyevka yarim doirada nazoratga olinganini e’lon qildi.Foto: EPA
Ukraina matbuotiga ko‘ra, iyul oyi boshidan beri Avdeyevka kuchli o‘qqa tutilgan. Shaharda ko‘plab fuqarolik obyektlari, xususan, kasalxona, turar joy binolari, avtobaza va Avdeyevka koks kimyo zavodi vayron bo‘lgan.Foto: EPA
Ukraina askarlari front chizig‘i yaqinida zirhli mashinada ketmoqda. Ushbu surat Donetsk viloyatining qaysi hududida olingani aytilmagan.Foto: AFP
Ukraina askarlari Donetskdan 80 kilometr uzoqlikda joylashgan Pokrovsk shahridagi restoranda ichimlik sotib olmoqda. 16-iyul kuni tushdan keyin rus qo‘shinlari shaharga hujum qilgan. Mahalliy hokimiyat ma’lumotlariga ko‘ra, otishmalarda 27 uy vayron bo‘lgan, tinch aholi jabrlangan.Foto: AP Photo
Konstantinovkadagi vayron bo‘lgan omborda turgan traktor.Foto: Getty Images
Dnepr
Vokzalda odamlar Dnepr shahridan Lvovga olib ketadigan poyezdga chiqishga hozirlik ko‘rmoqda. 16-iyul kuni Rossiya qo‘shinlari raketa-kosmik texnologiyalarni ishlab chiqaradigan “Yujmash” zavodini o‘qqa tutdi. Mahalliy ma’muriyat uch kishi halok bo‘lgani va 16 kishi yaralangani haqida xabar berdi.Foto: Reuters
Dneprlik kishi qizi va mushugini Lvovga jo‘naydigan poyezdga chiqarishdan oldin ular bilan xayrlashmoqda.Foto: Reuters
Xarkov
20-iyul kuni ertalab Rossiyaning Saltovka hududiga raketa hujumlari oqibatida halok bo‘lgan ayolning jasadi olib ketilmoqda. Mahalliy hokimiyat ma’lumotlariga ko‘ra, jamoat transporti to‘xtash joyi “Uragan”lardan o‘qqa tutilgan. Uch nafar tinch aholi halok bo‘ldi.Foto: Reuters
Halok bo‘lganlardan biri 13 yoshli bola. U 15 yoshli opasi bilan avtobus kutayotgan edi — qiz tirik qoldi, ammo kasalxonada.Foto: EPA
Bolaning otasi o‘g‘li uchun ikki soat duo o‘qidi. Bu vaqt davomida u bolaning qo‘lini qo‘yib yubormadi, politsiyachi esa erkakning yonida dalda bo‘lib turdi.Foto: Anadolu
Izoh (0)