20 июль куни эрталаб Россия қўшинлари Харьков шимолидаги Салтовка ҳудудини ўққа тутди. Ракеталар автобус бекатига келиб тушди: 3 нафар тинч аҳоли, жумладан 13 ёшли бола ҳалок бўлди. Россия ташқи ишлар вазири Сергей Лавров «Украина билан музокара қилишдан маъно йўқ»лигини ва «махсус операция географияси» ўзгарганини айтди: «Бу фақат ДХР ва ЛХР билан чекланмайди, бу Херсон, Запорожье вилояти ва бошқа бир қатор ҳудудларни ўз ичига олади».
Запорожье вилоятининг оккупацион ҳукумати Украина дронлари Запорожье атом электр станциясига зарба бергани ва 11 киши жабр кўрганини даъво қилмоқда. Белгород вилояти, маҳаллий ҳокимият маълумотларига кўра, «Украина томонидан» ўққа тутилган, оқибатда маҳаллий аҳоли ҳалок бўлган. Европа Иттифоқи Россияга қарши санкцияларнинг еттинчи пакетини тасдиқлади. Еврокомиссия раҳбарининг фикрича, ЕИ Россия газидан бутунлай воз кечиши мумкин. Meduza Украинадаги урушнинг 147-кунига оид асосий фотосуратларини тақдим этди.
Киев вилояти
Елена Барва 24 февраль куни Гостомелни тарк этган эди — шаҳар урушнинг дастлабки соатларидан бошлаб рус қўшинларининг асосий нишонларидан бирига айланган. Аёл Бучага жойлашди, сўнг Ғарбий Украинага кўчди. Бир неча ой ўтгач, Елена ўзи 44 йил яшаган квартираси Россия зарбасидан омон қолган-қолмаганини кўриш учун Гостомелга қайтди.Фото: EPA
Хавфли бўлгани учун Елена квартираси жойлашган бешинчи қаватга кўтарила олмади — айнан ушбу турар жой бино энг кўп зарарланган. У мобил телефони ёрдамида вайрон бўлган уйининг бир нечта фотосуратларини олди. Аёлнинг айтишича, у деразадан ошхонасидаги оқ печкани кўрган. Келажакда нима бўлади, унга қоронғи. Ҳозирча аёл мамлакатнинг ғарбий қисмида қолади, лекин бир кун келиб Гостомелга қайтишга умид қилмоқда.Фото: EPA
Херсон вилояти
Ишчилар Херсон вилоятидаги реклама плакатини алмаштирмоқда. Ҳудуднинг салмоқли қисми март ойи бошидан бери Россия қўшинлари назоратида. «Янги маъмурият» вакиллари минтақанинг Россия таркибига кириши бўйича референдумлар ўтказиши ҳақида бир неча бор эълон қилган.Фото: «ТАСС»
Днепр дарёси устидан ўтган Антоновский кўприги, у Херсонни минтақанинг чап қирғоқ қисми билан боғлайди. У томон шаҳарнинг ўзи каби Россия қўшинлари назорати остида. Кўприкдан рус қўшинлари жиҳозлар ва ўқ-дориларини олиб ўтади. 19 — 20 июль кунлари Украина кўприкка ракета ҳужумларини амалга оширди. Агар у бузиб ташланса, Херсон вилоятининг ўнг қирғоғидаги рус ҳарбийлари асосий гуруҳдан узилади.Фото: «ТАСС»
Украина артиллериячилари қурол ва махсус техникаларни фронтга жўнатишдан олдин текширмоқда.Фото: Anadolu
Украина артиллериячилари Херсон вилоятидаги ҳарбий йиғилиш пунктида.Фото: Anadolu
Донбасс шимоли
ДХР жангчилари Авдеевка яқинидаги йўлни кузатмоқда. Шаҳар Донецкдан 13 километр узоқликда жойлашган ва стратегик муҳим нуқта ҳисобланади. 19 июль куни ДХР халқ милицияси вакили Эдуард Басурин Авдеевка ярим доирада назоратга олинганини эълон қилди.Фото: EPA
Украина матбуотига кўра, июль ойи бошидан бери Авдеевка кучли ўққа тутилган. Шаҳарда кўплаб фуқаролик объектлари, хусусан, касалхона, турар жой бинолари, автобаза ва Авдеевка кокс кимё заводи вайрон бўлган.Фото: EPA
Украина аскарлари фронт чизиғи яқинида зирҳли машинада кетмоқда. Ушбу сурат Донецк вилоятининг қайси ҳудудида олингани айтилмаган.Фото: AFP
Украина аскарлари Донецкдан 80 километр узоқликда жойлашган Покровск шаҳридаги ресторанда ичимлик сотиб олмоқда. 16 июль куни тушдан кейин рус қўшинлари шаҳарга ҳужум қилган. Маҳаллий ҳокимият маълумотларига кўра, отишмаларда 27 уй вайрон бўлган, тинч аҳоли жабрланган.Фото: AP Photo
Константиновкадаги вайрон бўлган омборда турган трактор.Фото: Getty Images
Днепр
Вокзалда одамлар Днепр шаҳридан Львовга олиб кетадиган поездга чиқишга ҳозирлик кўрмоқда. 16 июль куни Россия қўшинлари ракета-космик технологияларни ишлаб чиқарадиган «Южмаш» заводини ўққа тутди. Маҳаллий маъмурият уч киши ҳалок бўлгани ва 16 киши яралангани ҳақида хабар берди.Фото: Reuters
Днепрлик киши қизи ва мушугини Львовга жўнайдиган поездга чиқаришдан олдин улар билан хайрлашмоқда.Фото: Reuters
Харьков
20 июль куни эрталаб Россиянинг Салтовка ҳудудига ракета ҳужумлари оқибатида ҳалок бўлган аёлнинг жасади олиб кетилмоқда. Маҳаллий ҳокимият маълумотларига кўра, жамоат транспорти тўхташ жойи «Ураган»лардан ўққа тутилган. Уч нафар тинч аҳоли ҳалок бўлди.Фото: Reuters
Ҳалок бўлганлардан бири 13 ёшли бола. У 15 ёшли опаси билан автобус кутаётган эди — қиз тирик қолди, аммо касалхонада.Фото: EPA
Боланинг отаси ўғли учун икки соат дуо ўқиди. Бу вақт давомида у боланинг қўлини қўйиб юбормади, полициячи эса эркакнинг ёнида далда бўлиб турди.Фото: Anadolu
Изоҳ (0)