Britaniya Mudofaa shtabi: Rossiya urushda qo‘shinlarining uchdan bir qismini yo‘qotdi — 50 ming kishi halok bo‘lgan yoki yaralangan

Ukrainadagi urush mobaynida Rossiya quruqlikdan hujum qilish salohiyatining 30 foizdan ortig‘ini yo‘qotdi, dedi Britaniya Mudofaa shtabi boshlig‘i admiral Toni Radakin.

Uning so‘zlariga ko‘ra, qariyb besh oylik janglarda 50 ming rossiyalik askar yo halok bo‘lgan yoki yaralangan, 1700 ga yaqin rus tanki va 4 mingga yaqin zirhli jangovar texnikasi yo‘q qilingan. Shu sababli, dedi Britaniya qurolli kuchlari qo‘mondoni, Ukraina armiyasi urushda g‘alaba qozonishiga to‘liq ishonmoqda.

“Rossiya bu bosqinni butun Ukrainani egallab olish niyatida boshlagan, Rossiya birinchi 30 kun ichida shaharlarni egallash, NATOga darz yetkazish va bosim o‘tkazish niyatida edi — bu Rossiya dunyo tartibiga da’vogar sifatida o‘zining barcha ambitsiyalarida muvaffaqiyatsizlikka uchramoqda, bu Rossiya fevral oyining boshidagiga qaraganda ancha zaiflashgan davlat”, — dedi Britaniya harbiysi.

Rossiya Mudofaa vazirligi rossiyalik qo‘shinlarning umumiy yo‘qotishlari haqida atigi ikki marta, oxirgi safar 25-mart kuni xabar bergan edi. O‘shanda vazirlik Ukrainada “maxsus operatsiya” boshlanganidan beri 1351 nafar rossiyalik askar halok bo‘lganini va yana 3825 kishi yaralanganini aytgan.

“Mediazona” va BBC ochiq ma’lumotlar asosida 15-iyulga qadar Ukrainada 4760 nafar rossiyalik askar halok bo‘lganini tasdiqladi.

Ukraina Qurolli Kuchlari Bosh shtabi Rossiya qo‘shinlarining yo‘qotishlari haqida har kuni xabar beradi. 17-iyul holatiga, Ukraina Qurolli kuchlari ma’lumotlariga ko‘ra, urush boshlanganidan beri 38,3 ming rossiyalik askar halok bo‘lgan.