Украинадаги уруш мобайнида Россия қуруқликдан ҳужум қилиш салоҳиятининг 30 фоиздан ортиғини йўқотди, деди Британия Мудофаа штаби бошлиғи адмирал Тони Радакин.
Унинг сўзларига кўра, қарийб беш ойлик жангларда 50 минг россиялик аскар ё ҳалок бўлган ёки яраланган, 1700 га яқин рус танки ва 4 мингга яқин зирҳли жанговар техникаси йўқ қилинган. Шу сабабли, деди Британия қуролли кучлари қўмондони, Украина армияси урушда ғалаба қозонишига тўлиқ ишонмоқда.
«Россия бу босқинни бутун Украинани эгаллаб олиш ниятида бошлаган, Россия биринчи 30 кун ичида шаҳарларни эгаллаш, НАТОга дарз етказиш ва босим ўтказиш ниятида эди — бу Россия дунё тартибига даъвогар сифатида ўзининг барча амбицияларида муваффақиятсизликка учрамоқда, бу Россия февраль ойининг бошидагига қараганда анча заифлашган давлат», — деди Британия ҳарбийси.
Россия Мудофаа вазирлиги россиялик қўшинларнинг умумий йўқотишлари ҳақида атиги икки марта, охирги сафар 25 март куни хабар берган эди. Ўшанда вазирлик Украинада «махсус операция» бошланганидан бери 1351 нафар россиялик аскар ҳалок бўлганини ва яна 3825 киши яраланганини айтган.
«Медиазона» ва BBC очиқ маълумотлар асосида 15 июлга қадар Украинада 4760 нафар россиялик аскар ҳалок бўлганини тасдиқлади.
Украина Қуролли Кучлари Бош штаби Россия қўшинларининг йўқотишлари ҳақида ҳар куни хабар беради. 17 июль ҳолатига, Украина Қуролли кучлари маълумотларига кўра, уруш бошланганидан бери 38,3 минг россиялик аскар ҳалок бўлган.
Изоҳ (0)