Gretsiyada Ukrainaning Meridian aviakompaniyasiga tegishli An-12 yuk samolyoti qulab tushgani haqida xabar berilgandi. Serbiya mudofaa vaziri Neboysha Stefanovichning ma’lum qilishicha, samolyot bortidagi ekipaj a’zolarining barchasi — sakkiz kishi halok bo‘lgan.
17-iyul kuni bo‘lib o‘tgan matbuot anjumanida vazirning aytishicha, samolyot Serbiyada minomyotlar uchun ishlab chiqarilgan 11,5 tonna o‘q-dorilarni Bangladeshga olib ketayotgan edi. Serbiyaning Nish shahridan uchgan An-12 Iordaniya poytaxti Ammanda to‘xtab o‘tishi kerak edi.
Samolyot 16-iyul kuni kechqurun Gretsiya shimolidagi Kavala shahri yaqinida qulab tushgan. Internetda samolyot qulagan joydan olingan videolar tarqaldi.
Gretsiya armiyasining maxsus yadroviy, biologik va kimyoviy qidiruv bo‘limi keyinroq halokat joyida portlovchi yoki kimyoviy moddalar bor-yo‘qligini tekshiradi.
Halokat joyidan kuchli hid paydo bo‘lgani sababli ehtiyot chorasi sifatida, munitsipalitet, politsiya va o‘t o‘chirish bo‘limi vakillaridan iborat muvofiqlashtirish qo‘mitasi hududga eng yaqin joylashgan ikki aholi punktidagi larga derazalarini yopiq holda saqlashni, ko‘chaga chiqmaslik va niqob taqishni tavsiya qildi.
Izoh (0)