Ozarbayjon va Armaniston tashqi ishlar vazirlari Jeyhun Bayramov va Ararat Mirzoyan Tbilisida muzokaralar o‘tkazdi, unda mamlakatlar o‘rtasidagi munosabatlarni normallashtirish masalalari muhokama qilindi. Bu haqda Ozarbayjon TIV matbuot xizmati xabar berdi.
Bayramov barcha sa’y-harakatlarni Ozarbayjon va Armaniston o‘rtasida yaxshi qo‘shnichilik va davlatlararo munosabatlarni o‘rnatishga yo‘naltirish hamda Uch tomonlama bayonotning barcha qoidalarini, xususan, Armaniston qurolli kuchlarini Ozarbayjon hududidan olib chiqib ketishni to‘liq amalga oshirish zarurligini ma’lum qildi (Tog‘li Qorabog‘dagi so‘nggi mojaro yakunlariga ko‘ra, hududlarning bir qismi Bokuga berildi).
“Gumanitar masalalarga kelsak, vazir Jeyhun Bayramov bedarak yo‘qolgan 4000 ga yaqin ozarbayjonlik taqdiriga oydinlik kiritish muhimligini ta’kidladi”, — deya qo‘shimcha qiladi Ozarbayjon TIV.
Shu bilan birga, Armaniston TIV rahbari Tog‘li Qorabog‘ mojarosini siyosiy yo‘l bilan hal etish tinchlikka erishish uchun muhim ekanini aytgan va shu munosabat bilan vazir Yevropa xavfsizlik va hamkorlik tashkilotining Minsk guruhi “hamkorlik instituti va tajribasidan foydalanish muhimligini ta’kidlagan”. Mirzoyan, shuningdek, armanistonlik harbiy asirlarni ozod qilish va vataniga qaytarish, bedarak yo‘qolganlarning taqdiriga oydinlik kiritish masalasiga to‘xtaldi.
Aprel oyida, 2020-yilgi mojaro tugaganidan beri birinchi marta Yerevan va Boku tinchlik shartnomasi bo‘yicha aniq takliflarni muhokama qila boshlagan edi. Ozarbayjon prezidenti Ilhom Aliyev va Armaniston bosh vaziri Nikol Pashinyan Bryusselda uchrashib, Armaniston va Ozarbayjon chegaralarini aniqlash uchun ikki tomonlama komissiya tuzishga kelishib olgan.
Biroq 16-iyul kuni Ozarbayjon Mudofaa vazirligi arman harbiylari Kalbajar viloyatining Zyaylik aholi punktidagi pozitsiyalarini turli o‘q otuvchi qurollardan o‘qqa tutgani haqida xabar berdi. Boku javob choralarini ko‘rganini aytdi. Armaniston Mudofaa vazirligi Bokuni chegaradagi pozitsiyalarini o‘qqa tutganlikda ayblab, arman harbiylari o‘z navbatida javob choralarini ko‘rganini ta’kidladi.
Izoh (0)