Ukrainadagi jangovar harakatlarda 20 kun ichida 7000 dan ortiq rossiyalik harbiy halok bo‘ldi. Bu Iroq va Afg‘onistondagi 20 yillik urushlar davomida halok bo‘lgan amerikalik askarlarning umumiy sonidan ko‘p, deb yozadi The New York Times Amerika razvedkasining “konservativ hisob-kitoblariga” tayanib.

Gazetaning yozishicha, yana 14—21 ming rus askari yaralangan. Nashr ma’lumotlariga ko‘ra, urushda Rossiya tomondan jami 150 mingdan ortiq harbiy xizmatchi qatnashmoqda.

Pentagon rasmiylarining ta’kidlashicha, ko‘p va ortib borayotgan qurbonlar Rossiya armiyasining ruhiy holatiga putur yetkazishi mumkin.

Shu bilan birga, NYT manbalari qurbonlar haqida ularning qo‘lidagi ma’lumotlar noto‘g‘ri bo‘lishi mumkinligini ta’kidladi. Ular OAV tahlili, sun’iy yo‘ldosh tasvirlari, o‘qqa tutilgan rus askarlari va texnikalarining suratlari, shuningdek, tomonlarning rasmiy ma’lumotlari asosida tuzilgan. Rasmiy ma’lumotlarda esa Ukraina tomoni yo‘qotishlarni oshirib, Rossiya kamaytirib ko‘rsatgan bo‘lishi mumkin.

Rossiya Mudofaa vazirligi urush boshlanganidan beri yo‘qotishlari haqida faqat bir marta e’lon qildi. 2-mart kuni vazirlik Ukrainada 498 nafar rossiyalik harbiy halok bo‘lganini, yana 1597 kishi yaralanganini ma’lum qilgan.

Ukraina tomonining so‘nggi hisob-kitoblariga ko‘ra, Rossiya armiyasining yo‘qotishlari 13,8 ming kishini tashkil qiladi. Shu bilan birga, gap faqat o‘lganlar haqidami yoki yaradorlar va mahbuslar ham qo‘shib hisoblanganmi, aniqlik kiritilmagan.

Ukraina rasmiylari, shuningdek, urush paytida to‘rt nafar rossiyalik general halok bo‘lganini e’lon qildi. Rossiya bu ma’lumotlarni tasdiqlamadi. NYT manbalarining ta’kidlashicha, ko‘plab rossiyalik generallar himoyalanmagan telefonlar va ratsiyalarda gaplashadi. Generallardan kamida bir nafari Ukraina razvedkasi uning qo‘ng‘iroqlarini tutib, joylashgan joyini topgach, o‘ldirilgan.

Urush paytida hatto nizo ishtirokchilarining rasmiy vakillari tarqatayotgan ma’lumotni ham tekshirish imkonsiz.