Buyuk Britaniyaning kichik savdo aloqalari vaziri, bosh vazirlikka nomzod Penni Mordont The Telegraph gazetasiga yozgan maqolasida aytishicha, agar u Buyuk Britaniya hukumati rahbari etib tayinlansa, Ukrainada urush boshlagan Rossiyaning “shafqatsiz tajovuzi”ga qarshi sa’y-harakatlariga rahbarlik qiladi.
Mordontning qayd etishicha, Britaniya Rossiya bilan qarama-qarshilikka intilmayapti, biroq London Moskvaning harakatlariga “qo‘l qovushtirib turolmaydi”. Ukraina tuprog‘idagi janglar keng “qadriyatlar va ideallar to‘qnashuvi”ning bir qismidir, deb yozdi u hamda bosh vazir Boris Jonsonning Kiyevni qo‘llab-quvvatlash siyosatini davom ettirishga va’da berdi.
Siyosatchining aytishicha, agar u ushbu lavozimga tayinlansa, Britaniya AQSH, YI va boshqa asosiy hamkorlar bilan Ukrainaga harbiy yordam ko‘rsatishni muvofiqlashtirish bo‘yicha hamkorlikni kuchaytiradi va shu bilan birga “yevropalik ittifoqchilarini yanada ko‘proq ishlar qilishga undaydi”. London Rossiyaga qarshi sanksiyalar qo‘llashda “Katta yettilik davlatlari orasida yetakchi bo‘lib qoladi” va ularning bajarilishini nazorat qiladi, deya qo‘shimcha qildi Mordont.
Bosh vazirlikka nomzod, shuningdek, Ukraina harbiylarini tayyorlash dasturini kengaytirish imkoniyatlarini o‘rganishga va’da berdi. London Qirollik dengiz floti boshchiligida “Qora dengizning muhim strategik suvlarida aloqani yaxshilash va minalarni tozalash ishlarini boshqarish uchun” ishchi guruh tuzadi, deb yozgan Mordont.
Britaniya bosh vazirligi uchun Mordontdan tashqari sobiq moliya vaziri Rishi Sunak, tashqi ishlar vaziri Liz Trass, uy joy qurilishi bo‘yicha sobiq vazir o‘rinbosari Kemi Badenok va jamoatlar palatasining xalqaro qo‘mitasi rahbari Tom Tugendxat da’vogarlik qilmoqda.
Ayni paytda Buyuk Britaniya bosh vaziri vazifasini 7-iyul kuni iste’foga chiqishini e’lon qilgan Boris Jonson bajarmoqda. U hukumat a’zosi Kris Pincherning mast holatda janjal chiqargani va shilqimlik qilgani tufayli yuzaga kelgan shov-shuvdan keyin iste’fo berdi. Jonson Pincher avvalroq jinsiy shilqimliklarda ayblanganini bilgani, ammo shunga qaramay uni yuqori lavozimlarga tayinlagani ma’lum bo‘ldi.
Izoh (0)