Samarqand viloyatining Qo‘shrabot tumanidagi bog‘chada mudira metodistning boshiga bokal bilan urib, tan jarohati yetkazgani haqida xabar berilgan edi. Maktabgacha ta’lim vazirligi holat yuzasidan ma’lumot berdi.
Vazirlik axborotiga ko‘ra, mudiraligi aytilgan ayol Ch.A. metodist bo‘lib, unga vaqtinchalik rahbarlik lavozimi yuklatilgan. Boshi yorilgan ayol E.G. esa hamshira bo‘lgan.
Payariq tumani sanitariya-epidemiologik osoyishtalik va jamoat salomatligi bo‘limi xulosasiga ko‘ra, E.G.ning ta’nasida, ya’ni boshning chap chakka sohasida ezilib yirtilgan yara jarohatlari aniqlangan. Xulosada ushbu jarohat o‘tmas qattiq jismlarning bir marotaba zarb ta’siridagi mexanizmidan yetkazilgani, odatda kechuvida sog‘likni qisqa, ya’ni olti kundan ortiq, ammo yigirma bir kundan ko‘p bo‘lmagan muddatga buzilishiga olib kelishi, shuning uchun og‘irlik darajasiga ko‘ra yengil sog‘likning buzilishiga sabab bo‘lgan tan jarohatlari guruhiga kirishi qayd etilgan.
Xabarda aytilishicha, shu voqeadan so‘ng mudiralik vazifasini vaqtinchalik bajarib kelgan metodist Ch.A. bilan mehnat shartnomasi bekor qilingan.
Holat yuzasidan 2-iyun kuni Qo‘shrabot tumani IIB huzuridagi Tergov bo‘limi tomonidan Jinoyat kodeksining 109-moddasi 2-qismi bilan jinoyat ishi qo‘zg‘atilgan. Tergov harakatlari olib borilmoqda. Tergov natijalari bo‘yicha qo‘shimcha ravishda rasmiy munosabat bildiriladi.
Izoh (0)