Samarqand viloyatida “Hizb ut-tahrir” diniy-ekstremistik tashkiloti a’zosi ustidan sud hukmi o‘qildi, deya xabar qilmoqda viloyat IIB.

2022-yilning fevral oyida xorij davlatlari huquqni muhofaza qilish idoralari bilan amalga oshirilgan tezkor tadbirlar natijasida Pastdarg‘om tumanida istiqomat qilgan O‘zbekiston Respublikasi hududida faoliyati taqiqlangan “Hizb ut-tahrir” diniy-ekstremistik tashkiloti a’zosi 1978-yilda Samarqand viloyatida tug‘ilgan, Past Darg‘om tumani, Qorabo‘yin qishlog‘ida yashagan Abdullayev Obid Usmonovichning jinoiy faoliyatiga chek qo‘yilgan edi.

Tergov jarayonida ma’lum bo‘lishicha, O.Abdullayev Rossiyaning Sankt-Peterburg shahrida ishlashi davomida Facebook va “Odnoklassniki” ijtimoiy tarmoqlarida “Hizb ut-tahrir”ning audio-videomateriallarini tarqatib kelgan. Shuningdek, u oila a’zolari, xususan, farzandlariga “Hizb ut-tahrir”ning “Islom nizomi” kitobi va “Al-Va’y” nomli jurnalidan ekstremistik g‘oyalarni singdirib kelgan.

O.Abdullayevning jinoiy harakatlari “Hizb ut-tahrir”ning faol yollovchilari hisoblangan, ayni paytda xalqaro qidiruvda bo‘lgan quyidagi shaxslar tomonidan boshqarilgan.

Ular: “Mahmud Abdulmo‘min” taxallusli 1980-yilda Qirg‘iziston Respublikasida tug‘ilgan, Xoldarov Mahmudjon Abdumalikovich va ustoz Said aka taxallusli 1964-yilda Farg‘ona viloyati Oltiariq tumanida tug‘ilgan Mamarizayev Muhammad Homidovich.