Frenki de Yong jamoadoshlariga “Barselona”ni tark etmasligini ma’lum qildi

Frenki de Yong “Barselona” kiyim almashtirish xonasida jamoadoshlariga jamoa safini tark etishni xohlamayotganini aytdi.

“Men keta olmayman. Qanday qilib ‘Barselona’dan ketishim mumkin?”, — futbolchining so‘zlaridan iqtibos keltiradi Sport Es nashri.

Mankunianliklar niderlandiyalikni 85 million yevroga transfer qilish borasida “Barselona” bilan kelishuvga erishgani xabar qilingandi.

Angliya klubi 25 yoshli futbolchini jamoaga olib kelishni asosiy maqsad qilib olgan edi. Kataloniyaliklar rahbariyati ham de Yongni sotishni xohlamoqda.

Frenki ham Erik ten Hag bilan aloqalari yaxshi bo‘lishiga qaramasdan, “Barselona” safini tark etishni xohlamayapti.

Niderlandiyalik futbolchi Barselonadan uy sotib olgan.

Avvalroq de Yongning agenti mijozi “Manchester Yunayted”ga o‘tishni xohlamayotgani, mankunianliklar uni sotib olishga behuda urinmasligini so‘ragandi.