14-iyul kuni soat 14:15 atrofida Ukraina markazidagi Vinnitsa shahriga raketa hujumi uyushtirildi, uning oqibatida kamida 12 kishi halok bo‘ldi, 25 kishi jarohatlandi. Bu haqda Ukraina favqulodda vaziyatlar davlat xizmatiga tayanib, Meduza xabar berdi. Qurbonlar orasida bir bola ham bor, deydi Ukraina prezident ofisi rahbarining o‘rinbosari Kirill Timoshenko.
Ukraina politsiyasining ma’lum qilishicha, uchta Rossiya raketasi ofislar joylashgan binoga kelib tushgan. Bundan tashqari, Ofitserlar uyi va yaqin atrofdagi turar joy binolari raketa hujumlaridan zarar ko‘rgan. Zarba kasalxonaga ham tekkani aytilmoqda. “Strana.ua” nashrining yozishicha, zarba Ofitserlar uyi, “Yubileyniy” maishiy uyi va Ukraina harbiy-havo kuchlari yodgorligi joylashgan hududga berilgan. Vinnitsa viloyati harbiy boshqarmasi boshlig‘i Sergey Borzovning ma’lum qilishicha, yana to‘rtta raketa Vinnitsa viloyati ustida havo mudofaasi tomonidan urib tushirilgan.
Ukraina prezidenti Vladimir Zelenskiy Vinnitsadagi voqeani terakt deb atadi. “Rossiya har kuni tinch aholini yo‘q qilmoqda, ukrainalik bolalarni o‘ldirmoqda, tinch aholi nishonlariga raketalarni yo‘naltirmoqda. Harbiy obyekt yo‘q joyda. Bu ochiqdan ochiq terrorchilik harakati bo‘lmay nima?” — dedi Zelenskiy.
Rossiya Mudofaa vazirligi vaziyatga hozircha izoh bermadi.
Mavzuga doir: Odessaga raketa zarbasi berildi. Oqibatda 17 kishi halok bo‘ldi
Izoh (0)