Sharqiy Afrikada joylashgan Tanzaniya davlatining Lindi mintaqasida uch kishi burundan qon ketish bilan kechgan noma’lum kasallik oqibatida vafot etdi. Bu haqda Citizen mahalliy nashri xabar bermoqda.
Mahalliy shifokorlar jami 11 kishida “g‘alati” kasalliklar aniqlanganini ma’lum qildi: ulardan uch nafari vafot etdi, ikki nafari kasalxonaga yotqizildi, qolganlari izolyatsiya qilingan. Noma’lum kasallikka chalinish holatlari 5-iyuldan keyin qayd etila boshlangan. Simptomlar nafaqat burundan qon ketish, balki isitma, bosh og‘rig‘i va charchoqni ham o‘z ichiga oladi.
Tanzaniya prezidenti Samiya Hasan Suluxuning ta’kidlashicha, kasallik atrof-muhitning buzilishi ta’siridan paydo bo‘lgani taxmin qilinmoqda. Ba’zi yovvoyi turlarning hayoti jiddiy ravishda buzilgan, ular aholi punktlariga yaqinlashgan, natijada bu inson salomatligiga ta’sir qilgan.
Mwananchi portali mahalliy shifokorlarga tayanib, 13 kishi shunday infeksiyaga chalingani holati haqida yozmoqda. Bemorlarda o‘tkazilgan testlar Ebola viruslari, Marburg bezgagi va koronavirus uchun manfiy natijalarni ko‘rsatgan. Kasallar bilan aloqada bo‘lganlarning barchasi kuzatuv ostida, biroq ularda hech qanday alomat yo‘q.
Aprel oyida Jahon sog‘liqni saqlash tashkiloti (JSST) yana bir noma’lum kasallik — bolalarda gepatitning o‘rganilmagan shakli avj olganini qayd etgandi. 25-iyun holatiga JSST dunyoda ushbu kasallikka chalinish bo‘yicha 920 ta holatni qayd etgan, ularning yarmidan ko‘pi Yevropada, eng katta ko‘rsatkich Buyuk Britaniyada aniqlangan (267 kishi).
45 nafar bemor bola jigar transplantatsiyasiga muhtoj bo‘lgan, 18 ta o‘lim qayd etilgan. Kasallikning manbayi va patogenning yuqish usullari o‘rganilmoqda, ushbu kasallikka chalingan bemorlarda gepatitning odatiy viruslari (A, B, C, D va E) aniqlanmagan.
Izoh (0)