14 июль куни соат 14:15 атрофида Украина марказидаги Винница шаҳрига ракета ҳужуми уюштирилди, унинг оқибатида камида 12 киши ҳалок бўлди, 25 киши жароҳатланди. Бу ҳақда Украина фавқулодда вазиятлар давлат хизматига таяниб, Meduza хабар берди. Қурбонлар орасида бир бола ҳам бор, дейди Украина президент офиси раҳбарининг ўринбосари Кирилл Тимошенко.
Украина полициясининг маълум қилишича, учта Россия ракетаси офислар жойлашган бинога келиб тушган. Бундан ташқари, Офицерлар уйи ва яқин атрофдаги турар жой бинолари ракета ҳужумларидан зарар кўрган. Зарба касалхонага ҳам теккани айтилмоқда. «Strana.ua» нашрининг ёзишича, зарба Офицерлар уйи, «Юбилейний» маиший уйи ва Украина ҳарбий-ҳаво кучлари ёдгорлиги жойлашган ҳудудга берилган. Винница вилояти ҳарбий бошқармаси бошлиғи Сергей Борзовнинг маълум қилишича, яна тўртта ракета Винница вилояти устида ҳаво мудофааси томонидан уриб туширилган.
Украина президенти Владимир Зеленский Винницадаги воқеани теракт деб атади. «Россия ҳар куни тинч аҳолини йўқ қилмоқда, украиналик болаларни ўлдирмоқда, тинч аҳоли нишонларига ракеталарни йўналтирмоқда. Ҳарбий объект йўқ жойда. Бу очиқдан очиқ террорчилик ҳаракати бўлмай нима?» — деди Зеленский.
Россия Мудофаа вазирлиги вазиятга ҳозирча изоҳ бермади.
Мавзуга доир: Одессага ракета зарбаси берилди. Оқибатда 17 киши ҳалок бўлди
Изоҳ (0)