Шри-Ланка президенти оиласи билан мамлакатни тарк этди

Шри-Ланка президенти Нандасена Готабая Ражапакса мамлакатдан учиб кетди. Бу ҳақда AFP маҳаллий мансабдорларга таяниб хабар берди, деб ёзади «РБК».

AFP’га иммиграция хизмати вакиллари маълум қилишича, Ражапакса рафиқаси ва тансоқчилари билан бирга 12 июль, сешанбадан 13 июль, чоршанбага ўтар кечаси Мальдивга қараб учган Ан-32 ҳарбий самолёти йўловчилари орасида бўлган.

«Интерфакс» хабарига кўра, маҳаллий авиадиспетчер хизмати дастлаб Шри-Ланка президенти самолётининг қўниш сўровини рад этган, сўнг Мальдив  халқ мажлиси спикери ва собиқ президент Муҳаммад Нашид вазиятга аралашган.

Аввалроқ Ражапакса Америка визасини олишга урингани, аммо унга рад жавоби берилгани ҳақида The Hindu нашри АҚШнинг Коломбодаги элчихонаси амалдорига таяниб маълум қилганди. Парламент спикери Махина Япа Абейвардена президент «қўшни мамлакатда» бўлиб турганини айтган, аммо кейинроқ янглишганини даъво қилиб, бу хабарни рад этганди.

9 июль куни эрталаб намойишчилар президент қароргоҳини эгаллаб олди, президент аввалроқ у ердан хавфсиз жойга кўчириб ўтилганди. Ўшандан буён унинг жойлашган жойи номаълум бўлиб турганди. Шунингдек, бош вазир Ранил Викрамасингхе ҳам хавфсиз бошпанага жойлаштирилган, унинг уйи эса ўша куни кечқурун ёқиб юборилди. Коллупития провинцияси полицияси ўт қўйилиши юзасидан уч кишини ҳибсга олди, кейинроқ уларнинг иши жиноий текширувлар бўлимига берилди.

Оммавий тартибсизликлар ва қароргоҳининг эгаллаб олинишидан кейин Ражапакса ўз лавозимини тарк этишга рози бўлди. Абейвардена давлат раҳбари 13 июль куни истеъфога чиқишини маълум қилди. Ражапакса кетган тақдирда парламент спикери мамлакатнинг вақтинчалик президентига айланади. Викрамасингхе ҳам янги умумпартия ҳукумати шаклланганидан кейин бош вазирликдан  кетишга розилик берди. Бир қатор вазирлар ҳам истеъфо беришини эълон қилди. Президент қароргоҳини эгаллаб олган намойишчилар Ражапакса, Викрамасингхе ва ҳукумат истеъфога чиқмагунича у ерни тарк этмаслигини маълум қилганди.

9 июлдаги оммавий тартибсизликлар Шри-Ланкада баҳорда иқтисодий инқироз фонида бошланган норозиликларнинг авж нуқтасига айланди. Апрелда ҳукумат валюта етишмаслиги туфайли энг зарур маҳсулотлар импорти билан боғлиқ муаммолар сабабли ташқи қарз бўйича дефолт эълон қилди. Молия вазирлиги мамлакатдаги молиявий вазият пандемия ва Украинадаги воқеалар оқибатида ёмонлашганини маълум қилди. Вазир Али Сабрининг ҳисоб-китобларига кўра, мамлакатда инқирозни енгиш учун ташқаридан 3 миллиард евро миқдорида молиявий кўмак керак.

Маҳаллий The Print газетаси 9 июль кунги тартибсизликларда камида 45 киши жабрлангани ҳақида ёзганди, шуларнинг етти нафари — хавфсизлик кучлари ходимлари. Уларнинг кўпчилиги намойишчилар ва полиция ўртасидаги тўқнашувларда жабрланди, бунда хавфсизлик кучлари сув замбаражлари ва кўзни ёшлантирувчи газдан фойдаланган.

Аввалроқ БМТ бош котиби Шри-Ланкадаги инқирозни ҳал қилиш учун мулоқотга чақирган эди.