Visa dunyodagi yirik to‘lov tizimidan biridir. Ushbu xalqaro karta dunyoning deyarli barcha mamlakatlarida qabul qilinadi.
“Daryo” O‘zbekistonning barcha banklarida Visa karta ochish, xizmat ko‘rsatish tariflari, bank tanlashda nimalarga ahamiyat berish kerakligi va ularning narxi haqida so‘z yuritadi.
Visa kartalari — xalqaro to‘lov tizimlarida qo‘llaniladigan xalqaro karta hisoblanadi.
Masalan, UzCard va Humo kartalari orqali xalqaro internet-do‘konlarga to‘lov qilish imkoniyati deyarli yo‘q (kobeyjing kartalar bundan mustasno).
Xalqaro kartalar orqali esa App Store, Google Play va Amazon kabi do‘konlarga to‘lovlarni amalga oshirish mumkin.
Visa’ning qanday turlari bor?
Visa kartalarining 3 turi mavjud:
- Visa Virtual;
- Visa Classic;
- Visa Premium.
Visa Virtual elektron ravishda ochiladi, shu sababli uni terminallarda yoki bankomatlarda ishlatish mumkin emas. Asosiy afzallik — rasmiylashtirishning osonligi va past tariflardir.
Eng keng tarqalgan tur — bu Visa Classic. Unda xizmat ko‘rsatish past narxda va keng funksionallikda bo‘ladi.
Karta yordamida mehmonxona xonasini bron qilish, aviachiptalarni xarid qilish kabilarni amalga oshirish mumkin.
Premium karta — Visa Gold, Visa Platinum va Visa Infinite’da bir qator imtiyozlar mavjud.
Ular orqali to‘lov tizimlari hamkorlaridan chegirmalar, shuningdek, bir qator qo‘shimcha xizmatlarga ega bo‘lish mumkin. Masalan, sayohat uchun bepul sug‘urta, avtomobil sotib olishda 35 foizgacha chegirma, yuridik va tibbiy yordam kabilar.
Karta qanday ochiladi?
Deyarli barcha banklarda kartani rasmiylashtirish uchun faqat pasport va pul talab qilinadi.
Aksariyat hollarda bank ofisiga ikki marta borish talab etiladi: birinchisida — ariza yozib, hujjatlar taqdim etiladi, ikkinchisi — tayyor kartani olish uchun.
Bundan tashqari, hozirda Visa kartalarga onlayn buyurtma berish imkoniyati ham mavjud. Bunda Visa karta ochish uchun tanlangan bankning rasmiy saytiga kirish kerak.
Banklarning tartib-qoidalaridan kelib chiqib, tayyor kartani bank ofisidan olib ketish yoki yetkazib berish xizmatidan foydalanish mumkin.
Karta 2−3 yilga amal qiladi. Ushbu davrdan so‘ng bank kartani bepul qayta chiqaradi.
Shu bilan birga, xalqaro kartani ochish va undan foydalanish uchun bankka komissiya to‘lash kerak bo‘ladi :
- karta turiga qarab narxlar — 25 ming so‘mdan 200 ming so‘mgacha;
- kartadan foydalangan holda to‘lovlarni amalga oshirishda komissiyalar har bir tranzaksiya summasining 0,5 foizidan 1 foizigacha yechib olinadi.
Karta ochish uchun bankni qanday tanlash kerak?
Avvalo tariflarga e’tibor berish kerak — narxi, naqd pul olish va tovarlar uchun komissiya, minimal qoldiq miqdori va boshqalar.
Banklarning saytlarida nafaqat bank filiallari, balki bankomatlar joylashgan manzillar ham ko‘rsatilgan. Ularga e’tibor berish kerak.
Bunga sabab — karta chiqarilgan bank bankomatlaridagina pulni bepul yechish mumkin. Agar boshqa bankda naqd pul olinsa, ikkala bank ham komissiya yechib oladi.
Shuningdek, hamma banklarda xalqaro kartalarga xizmat ko‘rsatish turlicha bo‘ladi.
“Bank xizmati” sayti orqali qulay bank va karta turini tanlash imkoniyati bor.
Keyingi maqolalarda MasterCard, UnionPay va kobeyjing kartalari haqida to‘liq ma’lumotlar beriladi.
Izoh (0)