Visa дунёдаги йирик тўлов тизимидан биридир. Ушбу халқаро карта дунёнинг деярли барча мамлакатларида қабул қилинади.
«Дарё» Ўзбекистоннинг барча банкларида Visa карта очиш, хизмат кўрсатиш тарифлари, банк танлашда нималарга аҳамият бериш кераклиги ва уларнинг нархи ҳақида сўз юритади.
Visa карталари — халқаро тўлов тизимларида қўлланиладиган халқаро карта ҳисобланади.
Масалан, UzCard ва Humo карталари орқали халқаро интернет-дўконларга тўлов қилиш имконияти деярли йўқ (кобейжинг карталар бундан мустасно).
Халқаро карталар орқали эса App Store, Google Play ва Amazon каби дўконларга тўловларни амалга ошириш мумкин.
Visa’нинг қандай турлари бор?
Visa карталарининг 3 тури мавжуд:
- Visa Virtual;
- Visa Classic;
- Visa Premium.
Visa Virtual электрон равишда очилади, шу сабабли уни терминалларда ёки банкоматларда ишлатиш мумкин эмас. Асосий афзаллик — расмийлаштиришнинг осонлиги ва паст тарифлардир.
Энг кенг тарқалган тур — бу Visa Classic. Унда хизмат кўрсатиш паст нархда ва кенг функционалликда бўлади.
Карта ёрдамида меҳмонхона хонасини брон қилиш, авиачипталарни харид қилиш кабиларни амалга ошириш мумкин.
Premium карта — Visa Gold, Visa Platinum ва Visa Infinite’да бир қатор имтиёзлар мавжуд.
Улар орқали тўлов тизимлари ҳамкорларидан чегирмалар, шунингдек, бир қатор қўшимча хизматларга эга бўлиш мумкин. Масалан, саёҳат учун бепул суғурта, автомобиль сотиб олишда 35 фоизгача чегирма, юридик ва тиббий ёрдам кабилар.
Карта қандай очилади?
Деярли барча банкларда картани расмийлаштириш учун фақат паспорт ва пул талаб қилинади.
Аксарият ҳолларда банк офисига икки марта бориш талаб этилади: биринчисида — ариза ёзиб, ҳужжатлар тақдим этилади, иккинчиси — тайёр картани олиш учун.
Бундан ташқари, ҳозирда Visa карталарга онлайн буюртма бериш имконияти ҳам мавжуд. Бунда Visa карта очиш учун танланган банкнинг расмий сайтига кириш керак.
Банкларнинг тартиб-қоидаларидан келиб чиқиб, тайёр картани банк офисидан олиб кетиш ёки етказиб бериш хизматидан фойдаланиш мумкин.
Карта 2−3 йилга амал қилади. Ушбу даврдан сўнг банк картани бепул қайта чиқаради.
Шу билан бирга, халқаро картани очиш ва ундан фойдаланиш учун банкка комиссия тўлаш керак бўлади :
- карта турига қараб нархлар — 25 минг сўмдан 200 минг сўмгача;
- картадан фойдаланган ҳолда тўловларни амалга оширишда комиссиялар ҳар бир транзакция суммасининг 0,5 фоизидан 1 фоизигача ечиб олинади.
Карта очиш учун банкни қандай танлаш керак?
Аввало тарифларга эътибор бериш керак — нархи, нақд пул олиш ва товарлар учун комиссия, минимал қолдиқ миқдори ва бошқалар.
Банкларнинг сайтларида нафақат банк филиаллари, балки банкоматлар жойлашган манзиллар ҳам кўрсатилган. Уларга эътибор бериш керак.
Бунга сабаб — карта чиқарилган банк банкоматларидагина пулни бепул ечиш мумкин. Агар бошқа банкда нақд пул олинса, иккала банк ҳам комиссия ечиб олади.
Шунингдек, ҳамма банкларда халқаро карталарга хизмат кўрсатиш турлича бўлади.
«Банк хизмати» сайти орқали қулай банк ва карта турини танлаш имконияти бор.
Кейинги мақолаларда MasterCard, UnionPay ва кобейжинг карталари ҳақида тўлиқ маълумотлар берилади.
Изоҳ (0)