НАТО ва Евроиттифоқ мамлакатлари Украинага етказиб берилган қурол-яроғлар Европа қора бозорига тушиб қолишидан хавфсираб, улар устидан кузатувни яхшиламоқчи, чунки Ғарб мамлакатлари қуролларнинг Украина чегарасидан ўтганидан кейинги жойлашган жойидан бехабар. Бу ҳақда The Financial Times томонлар ўртасидаги музокараларнинг боришидан хабардор бўлган ғарблик мансабдорларга таяниб хабар берди.
Ҳозир бир қатор Евроиттифоқ ва НАТО мамлакатлари Украина ҳукумати билан қуролларни кузатиш ёки инвентаризация қилиш тизимини яратишни муҳокама қилмоқда, Киевда янада кенгроқ қамровли мониторинг тизими устида ишлашмоқда, дея маълум қилди газета манбалари. Уларнинг аниқлик киритишича, Ғарб қурол-яроғлари Польша ва Украина чегарасига келиб тушмоқда, у ердан фургонлар, юк машиналари ёки ҳатто хусусий автомобилларда ташиб кетилмоқда, уларнинг шундан кейинги жойлашган жойи номаълум.
«Қурол-яроғлар қаерга йўналтирилаётгани, улардан қаерда фойдаланилаётгани ёки ҳатто улар мамлакатда қоляптими-йўқми — бу бизга қоронғи», — деди манба.
Давлат департаменти Киев АҚШдан олган қуролларни тегишлича қўллаётганига ишончи комил эканини таъкидламоқда. Мураккаб вазиятга қарамасдан, бу масалада Украина томони билан доимий мулоқот йўлга қўйилган. Давлат департаменти раҳбарининг қурол-яроғ устидан назорат ва халқаро хавфсизлик бўйича ўринбосари Дениз Женкинс қайд этишича, «қурол-яроғнинг ноқонуний сизиб чиқиши бўйича потенциал эҳтимол» муҳокама қилинаётган масалалар орасида бор.
Шунингдек, Украина ҳукумати даъво қилишича, қурол-яроғларнинг мамлакатга ёки мамлакатдан (таъмир учун) ҳар қандай ҳаракатланиши пухталик билан ҳам Киев, ҳам бошқа мамлакатлар томонидан назорат қилинади. Украинада қурол контрабандаси бўйича йирик марказ ташкил топгани ҳақидаги тахминлар ҳақиқатга тўғри келмайди, деди Украина мудофаа вазири маслаҳатчиси Юрий Сак.
Аввалроқ Россия мудофаа вазири Сергей Шойгу Украина Ғарб давлатларидан 28 минг тоннадан ортиқ ҳарбий юк олгани, қуролларнинг бир қисми Яқин Шарққа чиқиб кетаётганини маълум қилганди.
АҚШ президенти Жо Байден Украинага қарийб 400 миллион доллар миқдорида қўшимча ҳарбий ёрдам ажратишни топширди. Ушбу ёрдам пакетига тўртта HIMARS баравар ўт очиш реактив тизими ва унинг ўқ-дорилари, учта тактик транспорт воситаси, 155 миллиметрли артиллерия ўқ-дорилари, портлатувчи ўқ-дорилар, контрбатарея кураш тизимлари, ҳарбий техника учун эҳтиёт қисмлар ва бошқа ускуналар киради.
Изоҳ (0)