Afg‘onistonning ikkita viloyatida bir kecha-kunduzda qariyb 40 kishi vabo (xolera) oqibatida vafot etdi. Bu haqda Afg‘onistonning Khaama Press va Pajhwok yangiliklar agentliklari xabar bermoqda.
Kasallik holatlari mamlakat janubidagi Helmand va Zobul viloyatlarida qayd etilgan. U yerda o‘tgan 24 soat ichida 120 dan ortiq odam vaboni yuqtirib olgan. Qurbonlarning kamida 15 nafari — bolalar.
Kasallanganlarning ko‘pchiligini Bag‘ron, Sivari va Daychopan tumanlari aholisi tashkil qiladi. Ikkala viloyatga ham ko‘chma tibbiy brigadalar yo‘naltirildi.
Ba’zi fuqarolarda vabo kasalligi o‘lim bilan tugayotganiga ular qoniqarsiz sanitariya-gigiyena sharoitlarida davolanayotgani sabab bo‘lmoqda. “Tolibon” tomonidan tuzilgan Sog‘liqni saqlash vazirligi Qandahor viloyatida ham bir necha kishi kasallanganini ma’lum qildi.
Vabo — Vibrio cholerae mikroorganizmi tomonidan qo‘zg‘atiluvchi o‘tkir infeksiya. Kasallikka diareya hamrohlik qiladi, u suvsizlanish va qon tomirlari yetishmovchiligini keltirib chiqaradi. Ko‘pincha kasallik infeksiya tushgan suv yoki dengiz mahsulotlari orqali yuqadi.
Avvalroq Xitoyning Uxan universitetida vabo bilan kasallanish bo‘yicha bitta holat aniqlangani xabar berilgandi, bemor kasalxonaga yotqizilgach, uning ahvoli barqarorlashgan, infeksiya simptomlari o‘tib ketgan.
Tadqiqotchilar hisob-kitoblariga ko‘ra, dunyoda har yili 1,3 milliondan 4 milliongacha vabo bilan kasallanish holati va 21—143 mingta o‘lim holati aniqlanadi. Agar davolanmasa, kasallik bemorning bir necha soat ichidagi o‘limi bilan tugaydi, deb ogohlantiradi Jahon sog‘liqni saqlash tashkiloti. Kasallik qo‘zg‘atuvchi bakteriya tushgan ovqat va suv orqali tarqaladi hamda kuchli diareya va suvsizlikni keltirib chiqaradi.
Xitoyda vabo eng yuqori, A sinfidagi kasalliklarga kiradi (o‘lat ham shu guruhga taalluqli). O‘tgan yili Xitoyda o‘lat bilan kasallanish bo‘yicha bitta, vabo bilan esa beshta holat aniqlangan.
Mavzuga doir: Kongoda bubonli vabo kasalligi tarqalishni boshladi
Izoh (0)