Афғонистоннинг иккита вилоятида бир кеча-кундузда қарийб 40 киши вабо (холера) оқибатида вафот этди. Бу ҳақда Афғонистоннинг Khaama Press ва Pajhwok янгиликлар агентликлари хабар бермоқда.
Касаллик ҳолатлари мамлакат жанубидаги Ҳелманд ва Зобул вилоятларида қайд этилган. У ерда ўтган 24 соат ичида 120 дан ортиқ одам вабони юқтириб олган. Қурбонларнинг камида 15 нафари — болалар.
Касалланганларнинг кўпчилигини Бағрон, Сивари ва Дайчопан туманлари аҳолиси ташкил қилади. Иккала вилоятга ҳам кўчма тиббий бригадалар йўналтирилди.
Баъзи фуқароларда вабо касаллиги ўлим билан тугаётганига улар қониқарсиз санитария-гигиена шароитларида даволанаётгани сабаб бўлмоқда. «Толибон» томонидан тузилган Соғлиқни сақлаш вазирлиги Қандаҳор вилоятида ҳам бир неча киши касалланганини маълум қилди.
Вабо — Vibrio cholerae микроорганизми томонидан қўзғатилувчи ўткир инфекция. Касалликка диарея ҳамроҳлик қилади, у сувсизланиш ва қон томирлари етишмовчилигини келтириб чиқаради. Кўпинча касаллик инфекция тушган сув ёки денгиз маҳсулотлари орқали юқади.
Аввалроқ Хитойнинг Ухань университетида вабо билан касалланиш бўйича битта ҳолат аниқлангани хабар берилганди, бемор касалхонага ётқизилгач, унинг аҳволи барқарорлашган, инфекция симптомлари ўтиб кетган.
Тадқиқотчилар ҳисоб-китобларига кўра, дунёда ҳар йили 1,3 миллиондан 4 миллионгача вабо билан касалланиш ҳолати ва 21—143 мингта ўлим ҳолати аниқланади. Агар даволанмаса, касаллик беморнинг бир неча соат ичидаги ўлими билан тугайди, деб огоҳлантиради Жаҳон соғлиқни сақлаш ташкилоти. Касаллик қўзғатувчи бактерия тушган овқат ва сув орқали тарқалади ҳамда кучли диарея ва сувсизликни келтириб чиқаради.
Хитойда вабо энг юқори, А синфидаги касалликларга киради (ўлат ҳам шу гуруҳга тааллуқли). Ўтган йили Хитойда ўлат билан касалланиш бўйича битта, вабо билан эса бешта ҳолат аниқланган.
Мавзуга доир: Конгода бубонли вабо касаллиги тарқалишни бошлади
Изоҳ (0)