Ҳиндистон 2023 йилда Хитойни ортда қолдириб, дунёда аҳолиси энг кўп мамлакатга айланади, деб ёзмоқда Reuters.
Бирлашган Миллатлар Ташкилотининг Бутунжаҳон аҳоли куни муносабати билан эълон қилган ҳисоботига кўра, жорий йилнинг 15 ноябрига қадар 8 миллиардга етадиган дунё аҳолиси 2030 йилда 8,5 миллиардга, 2100 йилда эса 10,4 миллиардга ўсиши мумкин.
Ўн йилда бир марта ўтказиладиган ички аҳолини рўйхатга олиш маълумотларига кўра, Ҳиндистон аҳолиси 2011 йилда 1,21 миллиард кишини ташкил қилган эди. 2021 йилда ҳукумат COVID-19 пандемияси сабабли аҳолини рўйхатга олишни кечиктирган.
БМТ ҳисоб-китобларига кўра, дунё аҳолиси 1950 йилдан бери энг паст суръатда ўсмоқда ва 2020 йилда ўсиш 1 фоиздан пастга тушди.
2021 йилда дунё аҳолисининг ўртача туғилиш даражаси бир аёлга 2,3 болани ташкил қилди, бу 1950 йилда 5 нафар болага тенг эди. Прогнозларга кўра, 2050 йилга бориб дунёда туғилиш даражаси янада пасаяди — ҳар бир аёлга 2,1 бола.
БМТ ҳисоботида айтилишича, пандемия туфайли дунёда ўртача умр кўриш 2019 йилдаги 72,8 ёшдан 2021 йилда 71 ёшга қисқарди.
БМТ маълумотларига кўра, 2050 йилга бориб дунё аҳолиси ўсишининг ярмидан кўпи саккизта давлатда — Конго, Миср, Эфиопия, Ҳиндистон, Нигерия, Покистон, Филиппин ва Танзания Бирлашган республикасида кузатилиши прогноз қилинмоқда. 2050 йилгача кутилаётган ўсишнинг ярмидан кўпи Африканинг Саҳрои Кабири ҳиссасига тўғри келиши кутилмоқда.
Изоҳ (0)