Rossiyada maymunchechak virusi bilan kasallanishning birinchi holati tasdiqlandi. Bu haqda “Rospotrebnadzor” (Rossiya Iste’molchilar huquqlarini himoya qilish va inson farovonligini nazorat qilish federal xizmati)ga tayanib, “Interfaks” xabar berdi.
Kasallik Yevropadan qaytgan hamda tanasida maymunchechakka xos toshmalar bilan kasalxonaga borgan yosh yigitda aniqlandi. Bemorning biomateriallari o‘rganilgach, uning maymunchechak bilan kasallangani tasdiqlandi. Bemor izolyatsiya qilingan, kasallik yengil shaklda.
“Rospotrebnadzor”ning xabar berishicha, bemor bilan kontaktda bo‘lgan shaxslarning barchasi aniqlangan va shifokorlar nazoratiga olingan. “Epidemiologik tekshiruv o‘z vaqtida boshlangani sababli infeksiyaning yanada keng tarqalishi ehtimoli to‘xtatildi”, — deya qo‘shimcha qildi boshqarma.
2022-yilning may oyida Yevropa va Amerikaning bir qancha mamlakatlarida maymunchechak infeksiyasining ilk holatlari aniqlangan edi. Jahon sog‘liqni saqlash tashkiloti ma’lumotlariga ko‘ra, yil boshidan 27-iyungacha bo‘lgan vaqtda 50 ta davlat va hududda 3413 kishida kasallik aniqlangan, bir kishi vafot etgan. Kasallanish holatlarining 86 foizi Yevropada qayd etilgan. Kasallik tez-tez uchraydigan Afrikada esa atigi 2 foiz holatlar aniqlangan.
Iyun oyida JSST maymunchechak epidemiyasini xalqaro ahamiyatga molik favqulodda holat deb e’lon qilmaslikka qaror qildi. Tashkilot, shuningdek, maymunchechak virusi nomini o‘zgartirishga qaror qildi, ammo hali yangi nom taqdim etmadi.
Izoh (0)