“Mango” guruhining a’zosi Farrux Raimov “Sevimli” telekanalining “Mashhurlar” ko‘rsatuviga bergan intervyusida guruhning sobiq a’zosi Hamdam Sobirov bilan do‘stligi haqida gapirdi.
Haqiqatan ham yoshiligimdan birga o‘sgan do‘stim. Joyi kelsa o‘zim yemasam ham, kiymasam ham, unga berganman, kerak bo‘lsa ota-onamga ham qarshi chiqqanman. Bergan mehrimga va do‘st bo‘lgan vaqtimga achinaman. U 500 ming dollarlik mashina minadimi yoki shaharning yarmini sotib olib, milliarder bo‘lib ketadimi, mayli. Yoshlikdagi do‘stlik yo‘q. Oradagi odamlar baribir munosabatlarni buzar ekan. Hozir undan ham, boshqasidan ham xafa emasman.Hamdam bilan do‘stligimizning buzilishiga oila sababchi bo‘lgan. Buni o‘zi xohladi, o‘rtada hech qanaqa urush bo‘lgani yo‘q. Bir narsani aytishim kerak, men Hamdamdan kibri uchun xafa bo‘lganman. Lekin bu ishni menga qilmagan, ikkita o‘rtog‘imga qilgan, kimligini Alloh biladi. U kelib ko‘rishmoqchi ham, yarashmoqchi ham bo‘ldi, lekin yurakdan xohlamadi. Kimlardir qayergadir chaqirdi, bormadim, joyi kelganda bir joyda ko‘rishib qoldik. Bo‘lmadi, sababi bu ko‘ngilni og‘ritadi. Boshqa do‘stlarim bilan urishsam ham, mayli, bir-ikki yil bo‘lgan bo‘lsa hech narsa emas. U bilan bitta oliygohda, kollejda birga o‘qiganmiz. Ikkalamiz institutga imtihon bo‘lishidan ikki kun oldin Navoiydan avtobusga birga o‘tirib kelganmiz. Hech narsamiz, uyimiz yo‘q bo‘lgan, to‘g‘ri institutga borganmiz. To‘g‘risi, qancha qiyinchilik bo‘lgan bo‘lsa, birga yonma-yon turganman. Juda ko‘p mehr berib yuborgan ekanman.
Men bergan mehrni u qabul qila olmagandir balki. Ko‘rmaganning ko‘rgani qursin, hozir hamma bir o‘zim bo‘lay deydi, u ham shunaqa degandir. Mayli, to‘yib olsin. Qanaqa voqea bo‘lishidan qat’i nazar meni eshitardi, balki u o‘zini eshitishlarini xohlagandir yoki oilasidagilar gaplashmaysan, degandir.
Men bilmayman. Kelib, yuzimga sen bilan do‘st bo‘lolmas ekanman, boshqa odamlar bilan do‘st bo‘lishim kerak ekan, deb aytgan. Nimaga, deb so‘rasam javob bermadi. Bir kuni keldi, o‘sha paytda yigirma kun gaplashmay ketganmiz, qayerdasan, tez sen bilan ko‘rishmasam bo‘lmaydi dedi, kelib quchoqlashib ko‘rishdi, noto‘g‘ri qilibman dedi, hammasi yaxshi bo‘lganida yana yo‘qolib qoldi. Qanaqa tushunish kerak, bilmadim. Mayli, taqdir shunaqa ekan, uning yo‘li boshqa, meniki boshqa. Omadini bersin, unga nisbatan hech qanday g‘arazligim yo‘q. Kun kelib tushunar balki.
Farrux Raimov, xonanda
Xonanda “Mango” guruhining bo‘linib ketishiga pul sabab bo‘lganini, guruhning sobiq a’zosi Azizxonning Hamdam Sobirov bilan ham aynan shuning uchun munosabatlari buzilganini aytgan.
Boshidan aytadigan bo‘lsam, guruhdagi hamma oddiy sharoitdagi oiladan bo‘lgan. Ko‘rmaganning ko‘rgani qursin, pul kelganidan keyin shunday bo‘ladi. Necha marotaba oramiz buzilgan bo‘lsa, barchasiga pul sababchi bo‘lgan. Kibr, pul... Birinchi marta urishib qolganimizda ayb Azizxonda bo‘lgan. Shundan keyin kelisha olmaganmiz, men ketganman, keyin qaytib kelganman. Mendan keyin u ketdi, undan keyin Hamdam. Keyin guruhga Oybek keldi. Manmanlik, kibr, bir-birini tushunmaslik bo‘lsa bo‘lmaydi baribir. Necha marotaba harakat qilib ko‘rdik, bo‘lmadi. Guruhda kimdir kimnidir aynitgan, fe’l-atvori bir-biriga to‘g‘ri kelmagan yoki qilgan ishimizni ko‘ra olmaganmiz”, — deydi Farrux Raimov intervyusida.
Izoh (0)