“Shaxslarga turli xil munosabatda bo‘lish mumkin, ammo tarixni shaxsiy ambitsiyalarga moslab, qayta yozib bo‘lmaydi”. Alisher Nikimbayev O‘FA rahbarlari jamlangan suratga munosabat bildirdi

O‘zbekiston futbol assotsiatsiyasi hamda O‘zbekiston milliy terma jamoasi rasmiy fotomuxbiri Hasan Pirmuhamedov o‘z telegram sahifasida assotsiatsiyasiga rahbarlik qilgan insonlar va terma jamoa bosh murabbiylari jamlangan suratni e’lon qildi. Futbol mutaxassisi Alisher Nikimbayev ushbu suratga munosabat bildirdi.

U yerda negadir Abdulhoshim Mutalov O‘FFning birinchi prezidenti sifatida ko‘rsatilgan. Garchi, u bu lavozimga faqat 1993-yil mart oyida saylangan bo‘lsa ham. Mustaqillikdan so‘ng O‘FFning birinchi prezidenti Adham Fozilbekov bo‘lib, u tashkilotni sovet davridan 1993-yil martiga qadar boshqargan. Ya’ni birinchi milliy chempionat uning qo‘l ostida o‘tkazilgan, milliy va olimpiya terma jamoalariga ilk murabbiylar ham uning qo‘l ostida tayinlangan.

Ammo “o‘zbek futboli ensklopediyasi” niqobi ostida bizga na Mirabror Usmonov, na aka-uka Rahimovlar nomi tilga olingan kitob sovg‘a qilinsa, nima ham derdik. Shaxslarga turli xil munosabatda bo‘lish mumkin, ammo tarixni shaxsiy ambitsiyalarga moslab, qayta yozib bo‘lmaydi.

Alisher Nikimbayev, futbol mutaxassisi