Rossiya suverenitetini mustahkamlash Ukrainadagi maxsus operatsiyalarning muqarrar, biroq qo‘shimcha ta’siri hisoblanadi, uning asosiy maqsadi esa Donbassni himoya qilish va mamlakatning o‘z xavfsizligini mustahkamlash bo‘lib qolmoqda. Bu haqda Rossiya prezidenti Vladimir Putin Duma fraksiyalari rahbarlari bilan uchrashuvda aytib o‘tdi, deb yozadi “RBK”.
“Ba’zi hamkasblarim bizning maxsus harbiy operatsiyamiz suverenitetimizning mustahkamlanishiga olib borishini qayd etdi, bu rost. Biroq bu operatsiyaning boshlanishi bunday maqsad bilan bog‘liq bo‘lmagan. Bu ikkilamchi ta’sir. Muqarrar, ammo ikkilamchi ta’sir”, — dedi u.
Maxsus operatsiyaning asosiy maqsadi sifatida Putin Donbassni himoya qilish va “Rossiyaning o‘z xavfsizligini mustahkamlash” deb atadi.
Maxsus operatsiyaning yakuniy natijasiga erishish uchun umummilliy darajada qurolli kuchlarni qo‘llab-quvvatlash juda muhim, dedi prezident.
“Bu yakuniy natijaga erishish uchun juda muhim. Unga baribir erishiladi, bu yerda hech qanday shubha yo‘q, lekin yigitlar vatani qo‘llab-quvvatlayotganini his qilib tursa, ularning ishlashi, jangovar vazifalarni bajarishi osonroq bo‘ladi”, — dedi u.
Avvalroq Putin Ukrainadagi Rossiya harbiy operatsiyasining yakuniy maqsadi Donbassni ozod qilish va Rossiyaning o‘zi uchun xavfsizlikni kafolatlash ekanini aytgandi. Qo‘shinlar belgilangan marralargacha yetib boryapti, lekin operatsiyaning tugash muddatlari haqida gapirmasa ham bo‘ladi, harbiylarni jadallashtirish — noto‘g‘ri, degan edi u.
24-fevral kuni Putin harbiy operatsiya o‘tkazilishini e’lon qilganida uning maqsadi Ukrainani “demilitarizatsiya va denatsifikatsiya qilish” (qurolsizlantirish va natsizmni yo‘qotish), shuningdek, Donbassning tinch aholisini “genotsid”dan himoya qilish ekanini aytgandi.
Prezident matbuot kotibi Dmitriy Peskov denatsifikatsiya deganda nima nazarda tutilayotganini tushuntirib, “Ukrainani ozod qilish va uni natsistlar kayfiyatidagi odamlardan tozalash” zarurligini aytgandi. U, shuningdek, so‘nggi vaqtlarda “anchagina” o‘sgan “harbiy potensialni neytrallashtirish” zaruriyatini ham ta’kidlagandi.
May oyida Rossiya tashqi ishlar vaziri Sergey Lavrov maxsus operatsiyalar maqsadi sifatida sharqiy Ukraina va Rossiya xavfsizligini ta’minlashni aytgandi. U Rossiya tomoni Ukrainada hokimiyat almashishini yoki prezident Vladimir Zelenskiy taslim bo‘lishini talab qilmasligini qayd etdi. U Ukrainadagi maxsus operatsiya tezligi “tinch fuqarolar va rossiyalik harbiy xizmatchilar uchun har qanday xavflarni minimallashtirish zaruriyatiga” bog‘liqligini aytdi.
G7 mamlakatlari sammitida so‘zlagan nutqida Zelenskiy jangovar harakatlar yil oxirigacha, qish boshlangunicha tugashini xohlashini aytdi.
Izoh (0)