Yaponiya sobiq bosh vaziri Sindzo Abega o‘q uzgan shaxs Yaponiya O‘z-o‘zini mudofaa qilish kuchlari sobiq dengizchisi bo‘lib chiqdi, deb xabar bermoqda “Kommersant”. Bu Abe nutq so‘zlagan Nara shahrida yashovchi 41 yoshli Tetsuya Yamagamidir. U qo‘lbola quroldan foydalangan.
Yamagami sobiq bosh vazirga qarata bir necha marta o‘q uzganidan keyin darhol qo‘lga olingandi. Ayni paytda u politsiya tomonidan so‘roq qilinmoqda.
Sobiq bosh vazirning hujumga uchragani aks etgan videoni NHK telekanali e’lon qildi.
Yamagamining qo‘lga olinishi:
NHK politsiyadagi manbalariga tayanib xabar qilishicha, Abe kasalxonaga olib ketilayotgan paytda hushi joyida bo‘lgan.
Tokio sobiq gubernatori Yoiti Masudzoe ma’lum qilishicha, Abening yuragi to‘xtab qolgan. BBC yozishicha, Yaponiyada “o‘lim rasman tasdiqlanmagan paytda ko‘pincha ushbu atamadan foydalaniladi”.
Eslatib o‘tamiz, Nara shahrida Yaponiya sobiq bosh vaziri Sindzo Abega suiqasd uyushtirildi, unga qarata o‘q uzildi, siyosatchi ayni paytda kasalxonada.
NHK politsiya ma’lumotlariga tayanib xabar berishicha, sobiq bosh vazirning yuragi to‘xtab qolgan, u vertolyotda kasalxonaga olib borilgan. Hukumatdagi mansabdorlardan biriga ko‘ra, Abe og‘ir ahvolda.
Izoh (0)