Qozog‘istonda 8-iyuldan bug‘doy, un va kungaboqar urug‘i eksportiga cheklovlar kiritilmoqda, deb yozadi “Gazeta.uz”. Tegishli buyruqni qishloq xo‘jalik vaziri Yerbol Karashukeyev imzoladi.
Mamlakatdan 550 ming tonnadan ko‘p bug‘doy yoki meslin (bug‘doy va javdar aralashmasi), 370 ming tonnadan ortiq bug‘doy yoki javdari un va 15 ming tonnadan ko‘p urug‘ olib chiqish mumkin emas.
Kvotalar mamlakat oziq-ovqat xavfsizligini ta’minlash uchun kiritilmoqda va 30-sentabrgacha amal qiladi.
O‘tgan safar Qozog‘iston Qishloq xo‘jalik vazirligi aprel oyida don va un olib chiqish uchun kvotalar joriy qilgan edi. 15-iyungacha mamlakatdan 1 million tonnadan oshiq bug‘doy yoki meslin, shuningdek, 300 ming tonnadan ko‘p un olib chiqish mumkin emasdi.
Karashukeyevning so‘zlariga ko‘ra, respublika butun dunyoda don taqchilligi xavfi hamda Ukrainaning Afrika va Yaqin Sharqqa don yetkazib berish bo‘yicha o‘z hajmini ta’minlashga qodir emasligi tufayli, shunday qadamni qo‘ymoqda.
“Kvotalash Qozog‘istonni o‘rtacha bir yillik eksport hajmiga teng, nazorat qilinuvchi bug‘doy va un eksporti bilan ta’minlaydi”, — deyiladi vazirlik xabarida.
Statistika ma’lumotlariga ko‘ra, 2022-yilgacha Qozog‘iston donining eksport salohiyati taxminan 1 million 250 ming tonnani tashkil qiladi.
1-iyundan O‘zbekiston kungaboqar va paxta moyi, shuningdek, kungaboqar urug‘i va boshqa moyli o‘simliklar eksportini taqiqladi.
Izoh (0)