“Moskvaga qarshi sanksiyalar qancha kerak bo‘lsa, shuncha vaqt davom etadi” — Olaf Shols

Ukrainani qo‘llab-quvvatlash uchun qancha vaqt kerak bo‘lsa, Rossiyaga qarshi sanksiyalar shuncha muddat davom etadi. Bu haqda Germaniya kansleri Olaf Shols ZDF telekanalida ma’lum qildi.

Teleboshlovchining Sholsga aytishicha, so‘rovlarga ko‘ra, Germaniya fuqarolarining 47 foizi Rossiyaga qarshi sanksiyalar olib tashlanishi uchun Ukrainaning o‘z hududlaridan voz kechishini yoqlaydi.

“Ukraina o‘zini himoya qila olishi uchun kerak bo‘ladigan vaqt davomida biz birdamlikni saqlab qolamiz”, — dedi Shols bunga javoban. Kansler Ukrainani qo‘llab-quvvatlash uzoq vaqt davom etishi mumkinligini ta’kidladi.

Avvalroq kansler energiya narxining oshishi Germaniyaga ijtimoiy tartibsizliklar bilan tahdid solishi mumkinligini tan olgandi. Sholsdan Germaniya xalqi uchun qishda issiqlik ta’minlanishiga kafolat bera olasizmi, deb so‘rashganda u shunday javob bergan: “Bu butun dunyoda sodir bo‘layotgan ko‘plab voqealarga bog‘liq”. Misol tariqasida u Rossiyadan gaz importining butunlay to‘xtatilishi xavfini keltirgan.