Россия суверенитетини мустаҳкамлаш Украинадаги махсус операцияларнинг муқаррар, бироқ қўшимча таъсири ҳисобланади, унинг асосий мақсади эса Донбассни ҳимоя қилиш ва мамлакатнинг ўз хавфсизлигини мустаҳкамлаш бўлиб қолмоқда. Бу ҳақда Россия президенти Владимир Путин Дума фракциялари раҳбарлари билан учрашувда айтиб ўтди, деб ёзади «РБК».
«Баъзи ҳамкасбларим бизнинг махсус ҳарбий операциямиз суверенитетимизнинг мустаҳкамланишига олиб боришини қайд этди, бу рост. Бироқ бу операциянинг бошланиши бундай мақсад билан боғлиқ бўлмаган. Бу иккиламчи таъсир. Муқаррар, аммо иккиламчи таъсир», — деди у.
Махсус операциянинг асосий мақсади сифатида Путин Донбассни ҳимоя қилиш ва «Россиянинг ўз хавфсизлигини мустаҳкамлаш» деб атади.
Махсус операциянинг якуний натижасига эришиш учун умуммиллий даражада қуролли кучларни қўллаб-қувватлаш жуда муҳим, деди президент.
«Бу якуний натижага эришиш учун жуда муҳим. Унга барибир эришилади, бу ерда ҳеч қандай шубҳа йўқ, лекин йигитлар ватани қўллаб-қувватлаётганини ҳис қилиб турса, уларнинг ишлаши, жанговар вазифаларни бажариши осонроқ бўлади», — деди у.
Аввалроқ Путин Украинадаги Россия ҳарбий операциясининг якуний мақсади Донбассни озод қилиш ва Россиянинг ўзи учун хавфсизликни кафолатлаш эканини айтганди. Қўшинлар белгиланган марраларгача етиб боряпти, лекин операциянинг тугаш муддатлари ҳақида гапирмаса ҳам бўлади, ҳарбийларни жадаллаштириш — нотўғри, деган эди у.
24 февраль куни Путин ҳарбий операция ўтказилишини эълон қилганида унинг мақсади Украинани «демилитаризация ва денацификация қилиш» (қуролсизлантириш ва натсизмни йўқотиш), шунингдек, Донбасснинг тинч аҳолисини «геноцид»дан ҳимоя қилиш эканини айтганди.
Президент матбуот котиби Дмитрий Песков денацификация деганда нима назарда тутилаётганини тушунтириб, «Украинани озод қилиш ва уни нацистлар кайфиятидаги одамлардан тозалаш» зарурлигини айтганди. У, шунингдек, сўнгги вақтларда «анчагина» ўсган «ҳарбий потенциални нейтраллаштириш» заруриятини ҳам таъкидлаганди.
Май ойида Россия ташқи ишлар вазири Сергей Лавров махсус операциялар мақсади сифатида шарқий Украина ва Россия хавфсизлигини таъминлашни айтганди. У Россия томони Украинада ҳокимият алмашишини ёки президент Владимир Зеленский таслим бўлишини талаб қилмаслигини қайд этди. У Украинадаги махсус операция тезлиги «тинч фуқаролар ва россиялик ҳарбий хизматчилар учун ҳар қандай хавфларни минималлаштириш заруриятига» боғлиқлигини айтди.
G7 мамлакатлари саммитида сўзлаган нутқида Зеленский жанговар ҳаракатлар йил охиригача, қиш бошлангунича тугашини хоҳлашини айтди.
Изоҳ (0)