Polsha Seymi (parlament quyi palatasi) 7-iyul kuni Finlyandiya va Shvetsiyaning NATOga qo‘shilishini bir ovozdan ma’qulladi. Bu haqda Polsha ichki xavfsizlik agentligi vakili Stanislav Jaringa tayanib, “Interfaks” xabar berdi.
“Xushxabar! Seym — Polsha parlamentining quyi palatasi Shvetsiya va Finlyandiyaning NATOga kirishi haqidagi hujjatlarni bir ovozdan ratifikatsiya qildi”, — deb yozdi Jarin Twitter’da.
Avvalroq Finlyandiya va Shvetsiyaning NATOga qo‘shilishi haqidagi protokollar Estoniya, Islandiya, Kanada tomonidan ratifikatsiya qilingan edi.
Shvetsiya va Finlyandiyaning NATOga a’zo bo‘lishini ratifikatsiya qilish jarayoni 5-iyul kuni boshlangan.
NATOga a’zolik to‘g‘risidagi bayonnomalar alyansga a’zo barcha davlatlar tomonidan ratifikatsiya qilinganidan keyin Finlyandiya va Shvetsiya unga rasman a’zo bo‘ladi. Alyans bosh kotibi Yens Stoltenbergning qayd etishicha, jarayon bir necha oy davom etishi mumkin.
Finlyandiya va Shvetsiya 18-may kuni alyansga kirish uchun ariza topshirgan. Arizalarni muhokama qilish Turkiya tomonidan bloklangan, biroq keyinchalik mamlakat e’tirozlarini qaytarib olgan. 29-iyun kuni NATO rahbariyati davlatlarni alyansga kirishga taklif qildi.
Izoh (0)