Finlyandiya va Shvetsiya NATOga kirish to‘g‘risidagi protokollarni imzoladi
Finlyandiya va Shvetsiya tashqi ishlar vazirlari Pekka Xaavisto hamda Enn Linde NATO shtab-kvartirasida alyansga qo‘shilish bo‘yicha protokollarni imzoladi. NATO bosh kotibi Yens Stoltenberg ikki davlatning a’zoligini ratifikatsiya qilish jarayoni boshlanganini e’lon qildi.
Hujjatlarni NATOga a’zo 30 ta davlat elchilari ham imzolagan. “Bugun biz alyansga qo‘shilish bayonnomasini rasman imzolayapmiz va ratifikatsiya jarayonini boshlayapmiz. NATO eshigi Yevropaning barcha demokratik davlatlari uchun ochiq. Bugun Finlyandiya, Shvetsiya hamda NATO uchun yaxshi kun, biz 32 a’zo davlat bilan kuchayib bormoqdamiz”, — dedi Stoltenberg.
Zarur hujjatlar alyans tarkibidagi barcha davlatlar tomonidan ratifikatsiya qilingandan so‘ng Finlyandiya va Shvetsiya NATOga a’zo bo‘ladi.
NATO Finlyandiya va Shvetsiyada yadro quroli joylashtirilmasligiga kafolat bera olmasligini bildirgan. Rossiya prezidenti Vladimir Putin bu ikki davlatda alyansning harbiy infratuzilmasi joylashtirilsa, Rossiya bunga aks tarzda javob berishini aytgan. Rossiya bilan chegara yaqinida joylashgan Finlyandiyaning Lappeenranta shahri ma’muriyati o‘z hududiga NATO bazasini joylashtirishga tayyorligini bildirgan.
Eslatib o‘tamiz, may oyida Finlyandiya va Shvetsiya Rossiyaning Ukrainadagi harbiy amaliyoti tufayli alyansga qo‘shilish uchun ariza bergan edi. Turkiya har ikki davlatni terrorchilarni yashirishda ayblab, o‘larning a’zoligiga qarshi chiqdi. Bir necha raund muzokaralaridan so‘ng Anqara alyansning kengayishiga to‘sqinlik qilmaslikka rozi bo‘ldi. Biroq buning uchun Turkiya prezidenti Rajab Toyyib Erdo‘g‘on Shvetsiya va Finlyandiyadan qonunlarni o‘zgartirishni talab qildi.
