Indoneziyaning Bali orolida bo‘lib o‘tgan yig‘ilishda G20 mamlakatlari tashqi ishlar vazirlari an’anaviy guruh bo‘lib suratga tushishdan bosh tortdi. Bu haqda Yaponiyaning Kyodo agentligi xabar berdi.
Xabarga ko‘ra, AQSH Davlat kotibi Entoni Blinken va boshqa G‘arb diplomatlari Rossiya tashqi ishlar vaziri Sergey Lavrov bilan birgalikda suratga tushishdan qochgan. Rossiya tomoni bu haqda izoh bermadi.
Avvalroq Indoneziya tashqi ishlar vaziri Retno Marsudi 7-iyul kuni G7 davlatlari vakillari Lavrovning ishtiroki bois tantanali ziyofatida qatnashishdan bosh tortganini aytgan edi. Rossiya Tashqi ishlar vazirligi matbuot kotibi Mariya Zaxarovaning aytishicha, Lavrov “boykotchilarning yo‘qligini payqamagan”.
Reuters agentligining ta’kidlashicha, Sergey Lavrov Baliga tashrifi chog‘ida Indoneziya tashqi ishlar vaziri bilan suratga tushgan, shu payt zalda “Urushni qachon to‘xtatasizlar?!” va “Nega urushni to‘xtatmayapsizlar?!” degan hayqiriqlar yangragan.
7-iyul kuni Balida G20 tashqi ishlar vazirlarining yuzma-yuz kengashi ochildi, asosiy muhokamalar 8-iyulga belgilangan. Sergey Lavrov dastlabki uchrashuvlardan birida Saudiya Arabistoni va Meksika tashqi ishlar vazirlari o‘rtasida o‘tirgan.
Izoh (0)