Польша парламенти Швеция ва Финляндиянинг НАТОга киришини бир овоздан маъқуллади

Польша Сейми (парламент қуйи палатаси) 7 июль куни Финляндия ва Швециянинг НАТОга қўшилишини бир овоздан маъқуллади. Бу ҳақда Польша ички хавфсизлик агентлиги вакили Станислав Жаринга таяниб, «Интерфакс» хабар берди.

«Хушхабар! Сейм — Польша парламентининг қуйи палатаси Швеция ва Финляндиянинг НАТОга кириши ҳақидаги ҳужжатларни бир овоздан ратификация қилди», — деб ёзди Жарин Twitter’да.

Аввалроқ Финляндия ва Швециянинг НАТОга қўшилиши ҳақидаги протоколлар Эстония, Исландия, Канада томонидан ратификация қилинган эди.

Швеция ва Финляндиянинг НАТОга аъзо бўлишини ратификация қилиш жараёни 5 июль куни бошланган.

НАТОга аъзолик тўғрисидаги баённомалар альянсга аъзо барча давлатлар томонидан ратификация қилинганидан кейин Финляндия ва Швеция унга расман аъзо бўлади. Альянс бош котиби Йенс Столтенбергнинг қайд этишича, жараён бир неча ой давом этиши мумкин.

Финляндия ва Швеция 18 май куни альянсга кириш учун ариза топширган. Аризаларни муҳокама қилиш Туркия томонидан блокланган, бироқ кейинчалик мамлакат эътирозларини қайтариб олган. 29 июнь куни НАТО раҳбарияти давлатларни альянсга киришга таклиф қилди.