Буюк Британия бош вазири Борис Жонсон икки вазирнинг истеъфога чиқиши муносабати билан парламент қўмиталари вакиллари билан икки соатлик суҳбатда қатнашади. Мажлис якунларига кўра Жонсоннинг ушбу лавозимдаги келажаги борасида қарор чиқарилади. Бу ҳақда Reuters хабар берди.
Қайд этилишича, Британия бош вазирининг ҳукмрон Консерватив партиядаги тобора кўпроқ маслакдошлари лавозимларини тарк этишни истаяпти. Жонсоннинг ўзи эса собиқ таълим вазирини молия вазирлигига раҳбар қилиб, ўз лавозимида қолишни режалаштираётганини кўрсатиб берди.
«Биз уни (Жонсонни) Даунинг-стритдан оёқларини типирчилатаётган, бақираётган ҳолатда олиб кетишимизга тўғри келади, шекилли. Лекин агар шундай қилишимиз керак бўлса, қиламиз», — деди Консерватив партиянинг ўз исмини ошкор қилмаган депутати.
Эслатиб ўтамиз, молия вазири Риши Сунак ҳамда соғлиқни сақлаш вазири Сажид Жавид истеъфо берди. Жавид бундан буёғига вазирлик ваколати доирасидаги ишларни виждонан бажара олишига шубҳа уйғонганини маълум қилди. Орадан ҳеч қанча вақт ўтмай Сунакнинг ҳам истеъфо бергани ойдинлашди.
«Жамоатчилик ҳукумат ишининг белгиланган тартибда кетишини кутади ва бу адолатли, жиддий ва ҳақиқатга мос. Эҳтимол мен ушбу лавозим менинг вазир сифатидаги охирги раҳбарлик ишим эканини тан олаётгандирман, лекин мазкур стандартлар учун курашиш зарурлигини яхши тушундим, шунинг учун ҳам истеъфога чиқяпман»,— дея ёзган Риши Сунак Twitter’да (Reuters иқтибоси).
Шунингдек, Консерватив партия раисининг ўринбосари Бим Афолами, Буюк Британиянинг Марокашдаги савдо вакили Эндрю Маррисон ва Британия вазирларининг парламентдаги уч нафар шахсий котиблари ҳам истеъфо берди.
Буюк Британиянинг мухолифатчи Лейбористлар партияси етакчиси Кир Стармер Жонсоннинг ҳукумати «қулаётгани»ни айтди. Либерал демократлар партияси етакчиси Эд Дейви Жонсонни зудлик билан истеъфога чиқишга чақирди.
Июнь бошида Жамоатчилик палатасининг Консерватив партиядан чиққан аъзолари Борис Жонсоннинг партия етакчиси ва мамлакат бош вазири лавозимида фаолиятини давом эттириши бўйича овоз бериш ўтказди. Унинг натижаларига кўра, Жонсон лавозимини сақлаб қолди.
Жонсоннинг танқидчилари фикрича, коронавирус туфайли локдаунлар ва чекловлар авжига чиққан пайтда ҳукумат аъзолари томонидан уюштирилган зиёфатларни унинг истеъфога чиқиши учун сабаб қилиб келтирмоқда.
Ўтган ҳафта Консерватив партиянинг Жамоатчилик палатасидаги бош ташкилотчиси ўринбосари Крис Пинчер шилқимликлар туфайли истеъфо берган эди. Шундан кейин Жонсон Пинчер аввал ҳам шилқимликлар ҳақидаги парламент суриштируви иштирокчиси бўлганига қарамай, уни янги лавозимларга тайинлагани учун кечирим сўради.
Изоҳ (0)