O‘zbekistonning bir qator hududlarida texnikum va kollejga o‘qishga kiritib qo‘yish uchun pul olgan shaxslar ushlandi

Andijon, Buxoro, Samarqand tumanlarida texnikum va kollejga o‘qishga kiritib qo‘yish uchun pul olgan shaxslar ushlandi. Bu haqda Bosh prokuratura huzuridagi departament xabar berdi,

Departament hamda DXXning Andijon viloyati Izboskan tumani bo‘limlari tomonidan o‘tkazilgan tezkor tadbirda, fuqaro N.Sh. 4 nafar fuqaroni tanishlari yordamida Andijon shahridagi “Abu Ali ibn Sino” nomidagi Jamoat salomatligi texnikumiga o‘qishga kiritib qo‘yish evaziga jami 2 400 dollarni olgan vaqtida ashyoviy dalillar bilan ushlangan.

Shu kabi departamentning Buxoro viloyati Vobkent tumani bo‘limi tomonidan o‘tkazilgan tergovga qadar tekshiruvda, fuqaro U.A. boshqa bir fuqaro U.ning ishonchiga kirib, Buxoro shahridagi tibbiyot texnikumiga o‘qishga kiritib qo‘yish evaziga 1 500 dollarni firibgarlik yo‘li bilan qo‘lga kiritgani aniqlangan.

Departamentning Samarqand viloyati Past Darg‘om tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda, Past Darg‘om pedagogika kollejida bo‘lim boshlig‘i lavozimda ishlovchi A.U. fuqaro F.ga o‘zini ushbu kollej direktori o‘rinbosari deb tanishtirib, uning singlisini kollejning sirtqi bo‘limiga o‘qishga kiritib qo‘yish evaziga 300 dollarni olgan vaqtida ashyoviy dalillar bilan ushlangan

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.