Ijtimoiy tarmoqlarda tarqalgan “Tovuq go‘shtlari qanday tayyorlanishi haqida video ekan” sarlavhali video yuzasidan “Parrandasanoat” uyushmasi axborot xizmatining rasmiy munosabat bildirdi.
Qayd etilishicha, videodagi holat “Parrandasanoat” uyushmasi xodimlari tomonidan o‘rganilganida, Samarqand viloyatida bir oy avval sodir etilgani ma’lum bo‘ldi. Ushbu holat Samarqand viloyati Sanitariya-epidemiologik osoyishtalik va jamoatchilik nazorati boshqarmasi tomonidan aniqlanib, 27-iyun kuni jarimaga tortish bo‘yicha dalolatnoma tuzilgan. Tegishli hujjatlar hozirda huquqiy baho berish uchun sudga taqdim etilgan. Holat ayni paytda nazoratga olingan.
“Jamoatchilikka shuni ma’lum qilamizki, respublikamizda sotiladigan parranda go‘shtining asosiy qismi sanoatlashgan kushxonalar hissasiga to‘g‘ri keladi. Ayni paytda 30 dan ortiq yirik quvvatli, to‘liq avtomatlashtirilgan, zamonaviy texnologiyalar bilan jihozlangan kushxonalar faoliyat yuritmoqda.
Shuningdek, O‘zbekiston Respublikasi Prezidentining 2021-yil 14-iyundagi “Parrandachilikni rivojlantirish va tarmoq ozuqa bazasini mustahkamlashga qaratilgan qo‘shimcha chora-tadbirlar to‘g‘risida”gi Qarori asosida zamonaviy kushxona va muzlatkichlarni o‘z ichiga olgan 14 ta parrandalarni so‘yishga mo‘ljallangan namunaviy loyihadagi zamonaviy komplekslar qurilmoqda. Ushbu loyihalar keyingi yilda yanada ko‘proq go‘shtni qayta ishlash imkonini beradi.
Ayni paytda faoliyat yuritayotgan kushxonalardan biri 2018-yilda tashkil etilgan “Aziuz Group” MCHJ bo‘lib, yiliga 20 ming tonna parranda go‘shtini qayta ishlashga mo‘ljallangan. Korxona direktori Saidaziz Yuldashevning ma’lum qilishicha, Polshadan olib kelingan texnologiya parrandani so‘yish, tozalash, go‘shtini qismlarga ajratish jarayonida inson ishtirokini minimal darajaga keltirishga imkon bermoqda. Qolaversa, sanitariya talablari doirasida.
Veterinariya va chorvachilikni rivojlantirish qo‘mitasi hamda “Parrandasanoat” uyushmasi tomonidan hamkor tashkilotlar bilan videoda aks etgan holatlarni oldini olish bo‘yicha keng miqyosli amaliy ishlar olib borilmoqda”, – deyiladi munosabatda.
Izoh (0)