Qibray tumanining Chinobod ko‘chasidan avtomashinaga chiqqan homilador ayolda kutilmaganda to‘lg‘oq boshlanadi. Unga hamroh bo‘lgan qaynonasi uzoqdan tibbiyot muassasasi binosiga ko‘zi tushib, taksi haydovchisiga o‘sha yerga olib borishini aytadi.
Toshkentdagi Ulug‘bek shaharchasi 1-son poliklinikasi hududiga Matiz rusumli avtomashinada olib kelingan homilador ayolga zudlik bilan tibbiy yordam ko‘rsatishga kirishildi.
Bu vaziyatda har bir soniya hisobli edi.Tug‘uruq jarayoni esa allaqachon boshlangan. Shoshilish zarur! Aslida oilaviy poliklinika go‘dakni dunyoga keltirish uchun mo‘ljallanmagan bo‘lsa-da, ayolni shundoqqina ro‘paradagi ushbu muassasa binosiga olib o‘tishga ham fursat yetmadi.
Poliklinika mudirasi Hilola Jamilova o‘ta tezkorlik bilan butun mas’uliyatni zimmasiga olib, avtomobilning o‘zida ayolga doyalik qilishga kirishdi.
Mutaxassisligi akusher-ginekolog bo‘lgan mudira va uning jamoasi sa’y-harakati va qat’iyati sababli tug‘uruq muvaffaqiyatli amalga oshirildi.
Shundan so‘ng ona va bola sog‘lom holda poliklinikaga eng yaqin hisoblangan Qibray tumani tibbiyot birlashmasi tasarrufidagi tug‘uruq kompleksiga mutaxassis hamrohligida olib borilgan.
Hozir ona-bolaning ahvoli yaxshi, ular salomatligi tug‘uruq kompleksi shifokorlari nazorati ostida.
Tug‘uruq jarayoni kutilmaganda boshlangan homilador ayolga avtomashinada doyalik qilgan poliklinika mudirasi Hilola Jamilova Sog‘liqni saqlash vazirligi tomonidan taqdirlandi.
Shifokorga vazir o‘rinbosari Elmira Bositxanova tomonidan sog‘liqni saqlash vaziri Bekzod Musayevning tashakkurnomasi va esdalik sovg‘alari topshirildi.
O‘z navbatida, favqulodda vaziyatlarda o‘zini yo‘qotmay, kasb burchini sidqidildan bajarishda jonbozlik ko‘rsatayotgan sog‘liqni saqlash tizimining bunday fidoyi xodimlari milliy tibbiyotimizning yangi imijini yaratishda muhim rol o‘ynashi ta’kidlandi.
Izoh (0)