Ўзбекистоннинг бир қатор ҳудудларида техникум ва коллежга ўқишга киритиб қўйиш учун пул олган шахслар ушланди

Андижон, Бухоро, Самарқанд туманларида техникум ва коллежга ўқишга киритиб қўйиш учун пул олган шахслар ушланди. Бу ҳақда Бош прокуратура ҳузуридаги департамент хабар берди,

Департамент ҳамда ДХХнинг Андижон вилояти Избоскан тумани бўлимлари томонидан ўтказилган тезкор тадбирда, фуқаро Н.Ш. 4 нафар фуқарони танишлари ёрдамида Андижон шаҳридаги «Абу Али ибн Сино» номидаги Жамоат саломатлиги техникумига ўқишга киритиб қўйиш эвазига жами 2 400 долларни олган вақтида ашёвий далиллар билан ушланган.

Шу каби департаментнинг Бухоро вилояти Вобкент тумани бўлими томонидан ўтказилган терговга қадар текширувда, фуқаро У.А. бошқа бир фуқаро У.нинг ишончига кириб, Бухоро шаҳридаги тиббиёт техникумига ўқишга киритиб қўйиш эвазига 1 500 долларни фирибгарлик йўли билан қўлга киритгани аниқланган.

Департаментнинг Самарқанд вилояти Паст Дарғом туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда, Паст Дарғом педагогика коллежида бўлим бошлиғи лавозимда ишловчи А.У. фуқаро Ф.га ўзини ушбу коллеж директори ўринбосари деб таништириб, унинг синглисини коллежнинг сиртқи бўлимига ўқишга киритиб қўйиш эвазига 300 долларни олган вақтида ашёвий далиллар билан ушланган

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.