Moskva va Nukus o‘rtasidagi reyslar vaqtincha Urganch aeroportiga o‘tkazmoqda. Bu haqda Uzbekistan Airways matbuot xizmati xabar berdi.
Ma’lum qilinishicha, 5-iyuldan 29-iyulgacha Nukus—Moskva—Nukus yo‘nalishidagi 9626 va 9625 reyslari Urganch—Moskva—Urganch yo‘nalishi bo‘yicha, ya’ni Nukus shahridan emas, balki Urganch shahri xalqaro aeroportidan amalga oshiriladi. Parvozlar vaqti o‘zgarmagan.
Moskva—Nukus—Moskva yo‘nalishi bo‘yicha HY-9626 va HY-9625 reyslari Urganch xalqaro aeroportidan amalga oshiriladi.
7-iyuldan 28-iyulga qadar esa 727 va 728 Nukus—Aqtau—Nukus yo‘nalishlari bo‘yicha aviaqatnovlar quyidagi yangi jadval bo‘yicha amalga oshiriladi:
- Nukusdan jo‘nab ketish — soat 10:20 dan, Aqtauga yetib borish — soat 11:50,
- Aqtaudan jo‘nab ketish — soat 12:50, Nukusga yetib borish — soat 14:15 da.
Avvalroq 4-iyuldan 2-avgustga qadar Toshkent va Nukus o‘rtasidagi aviareyslar vaqti o‘zgargani haqida xabar berilgan edi.
Eslatib o‘tamiz, Nukusdagi ommaviy namoyishlardan so‘ng fuqarolarning xavfsizligini ta’minlash, ularning huquq va erkinliklarini himoya qilish, qonuniylik va huquq-tartibotni tiklash maqsadida Qoraqalpog‘iston hududida 3-iyul kuni soat 00:01 dan 2-avgust kuni soat 00:00 ga qadar bo‘lgan davrda favqulodda holat joriy etildi.
Favqulodda holat davrida soat 21:00 dan 7:00 gacha komendantlik soati joriy qilindi. Komendantlik soatlarida Nukus aeroport faoliyati cheklandi.
Izoh (0)