Andijon viloyati Sog‘liqni saqlash boshqarmasi boshlig‘i Salohiddin Yusupov hamda uning birinchi o‘rinbosari Shohruxmirzo Mamajonovlar lavozimidan ozod etildi. Bu haqda manbalarga tayanib “Daryo” muxbiri xabar bermoqda.
Ta’kidlanishicha, 2020-yilning dekabr oyidan buyon viloyat Sog‘liqni saqlash boshqarmasiga rahbarlik qilib kelayotgan Salohiddin Yusupov salomatligi tufayli o‘z xohishiga ko‘ra lavozimidan ozod etilgan. Uning o‘rniga boshqarma boshlig‘i vazifasini vaqtincha bajarish avval shu lavozimda ishlagan, ayni paytda Respublika ixtisoslashtirilgan dermatovenerologiya va kosmetologiya ilmiy amaliy tibbiyot markazi Andijon viloyat hududiy filiali direktori vazifasida ishlayotgan Qudrat Yarqulov tayinlangan.
Qudrat Yarqulov uzoq yillar viloyat teri-tanosil kasalliklari dispanserida turli lavozimlarda ishlagan. 2015—2017-yillarda viloyat Sog‘liqni saqlash boshqarmasi boshlig‘i sifatida faoliyat yuritgan.
Boshqarma boshlig‘ining birinchi o‘rinbosari Shohruxmirzo Mamajonov o‘rniga esa Andijon viloyati hokimi tavsiyasi bilan Qo‘rg‘ontepa tuman tibbiyot birlashmasi boshlig‘i Abdukarim Abduvahobov tayinlangan.
Avvalroq Andijon viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Otabek Tursunov ishdan olingani aytilgandi.
Izoh (0)